Улаанбаатар
Газрын тос боловсруулах үйлдвэрийн EPC-1 төслийн ажил 63 хувьтай үргэлжилж байна
МОНГОЛЫН МЭДЭЭ | ЭДИЙН ЗАСАГ
Улаанбаатар /МОНЦАМЭ/. Газрын тос боловсруулах үйлдвэр нь EPC-1,2,3,4 гэсэн дөрвөн багц төслөөс бүрдэж буй бөгөөд үйлдвэрийн технологийн бус барилга байгууламж, талбайн дэд бүтэц зам, ус хангамжийн системийн цогц төсөл болох EPC-1 төслийн ажилд төслийн менежмэнтийн зөвлөх Энэтхэг улсын “И Ай Эл” компани олон улсын норм дүрэм, стандартын дагуу гүйцэтгэлд хяналт тавьж байна хэмээн УУХҮЯ-наас мэдээллээ.
Төслийн ерөнхий гүйцэтгэгчээр Энэтхэг улсын ““Жэй Эм Си Прожэктс” ХХК, Монгол Улсын 21 туслан гүйцэтгэгч компанийн инженер, техникийн мэргэжилтнүүд нийт 641 хүн, 250 нэгж техниктэйгээр 2022 оны 11 сарын 29-нд төслийг хүлээлгэн өгөх төлөвлөгөөтэй ажиллаж байгаа аж.
EPC-1 төсөл нь бэлтгэл ажил, зураг төсөл, худалдан авалт, барилга угсралт гэсэн үндсэн 4 төлөвлөлттэй, төслийн нийт ажлын явц 63 хувийн гүйцэтгэлтэй хийгдэж байгаа юм байна. Эдгээрт Түүхий ус хадгалах сав-85 %, Оффис, сургалтын төв-51 %, Хоолны газар-84 %, Лаборатори-85 %, Анхны тусламж, эмнэлгийн барилга-80 %, Агуулах-45 %, Нэвтрэх хаалга-1-64 %, Нэвтрэх хаалга-2-39 %, Гал унтраах ангийн барилга-52 %, Засварын цех-35 %, Үерийн ус цуглуулах талбай-82,5 %, Ус зайлуулах хоолой-30 %, Ус дамжуулах хоолой-89 %, 17км авто зам-36 %, Ус дамжуулах хоолой-/Бор хөөвөр/-41 %, Худгийн барилга-44 %, Цахилгаан дамжуулах агаарын шугам-90 %-ийн тус тус гүйцэтгэл хийгджээ.
Лицензгүй технологийн байгууламжийн ажил EPC-2-ын ерөнхий гүйцэтгэгчийг сонгон шалгаруулах түргэвчилсэн тендерийг 2022.06.06-ны өдөр зарласан ба 2022.08.16-ны өдөр тендер хүлээн авах аж.
Харин үйлдвэрийн цахилгаан станцын ажил EPC-3-ын ерөнхий гүйцэтгэгчийг сонгон шалгаруулах түргэвчилсэн тендерийг 2022.05.04-ний өдөр зарласан ба 2022.07.04-ний өдөр тендер хүлээн авчээ.
Лицензтэй технологийн байгууламжуудыг барих ажил EPC-4-ийн лиценз эзэмшигчдийг шалгаруулсан ба Устөрөгчийн байгууламжийн лиценз эзэмшигч Итали улсын Кинетикс текноложи компани, Хүхэр ялгах байгууламжийн лиценз эзэмшигч Франц улсын Аксенс компани, Бензин боловсруулах, Гидрокрекинг, Дизелийн гидроцэвэрлэгээ, Шингэрүүлсэн шатдаг хий ялгах байгууламжуудын лиценз эзэмшигч АНУ-ын ЮүӨүПи Хонивэлл компанитай гэрээг тус тус байгуулаад байна.
Эх сурвалж: УУЛ УУРХАЙ, ХҮНД ҮЙЛДВЭРИЙН ЯАМ
Холбоотой мэдээ
