Улаанбаатар
ОРХОН: Сүрьеэ өвчнийг илрүүлэхэд хүний нөөц, тоног төхөөрөмжийг нэн түрүүнд нэмэгдүүлнэ
ОРОН НУТГИЙН МЭДЭЭ | ОРХОН
Орхон/МОНЦАМЭ/. Монгол Улс сүрьеэгийн өвчлөлийн дарамт өндөртэй болон олон эмэнд тэсвэртэй сүрьеэгийн өвчлөл өндөр орны жагсаалтад багтдаг байна. Иймд “Сүрьеэг устгах” дэлхийн стратегийн зорилтот хүрэх үйл ажиллагааг эрчимжүүлэх зорилгоор ЭМЯ, Дэлхийн эрүүл мэндийн байгууллага, Глобал сангийн дэмжлэгтэй ДОХ, сүрьеэгийн хөтөлбөрийн улсын хамтарсан үнэлгээг хийх ажлын баг Орхон аймагт ажиллаж байна.
Ажлын багийг аймгийн
Засаг даргын Тамгын газрын даргын үүргийг түр орлон гүйцэтгэгч Ш.Ганболд,
Нийгмийн бодлогын хэлтсийн дарга А.Бумансор, ЭМГ-ын дарга Д.Сүхээ, БОЭТ-ийн
захирал Наран-Эрдэнэ нар хүлээн авч уулзлаа.
Нийт 12 хүний бүрэлдэхүүнтэй ажлын баг 5 хоногийн турш тус аймагт ажиллах бөгөөд ЭМГ, БОЭТ-ийн сүрьеэгийн тасаг, өрхийн эрүүл мэндийн
төвүүд, эрүүл мэндийн даатгалын хэлтэс, Эрдэнэт медикал эмнэлэгт ажиллаж
сүрьеэ өвчний эсрэг хийж хэрэгжүүлж буй үйл ажиллагаа болон тусламж
үйлчилгээний санхүүжилт, хөтөлбөрийн хэрэгжилтийн талаар мэдээлэл солилцох
ажээ.
Энэхүү хамтарсан үнэлгээ нь Монгол Улсад 9 жилийн дараа дахин хийж байгаагаараа
онцлог юм. Энэ удаагийн судалгаанаас гарсан дүгнэлтийг цаашид сүрьеэ өвчнөөс
урьдчилан сэргийлэх ажилд том дэмжлэг болно гэдгийг онцолж, Орхон аймгийн хувьд энэхүү өвчлөлийн эсрэг
авч хэрэгжүүлэх арга хэмжээний нэн тэргүүнд тоног төхөөрөмжийн сайжруулалт,
хүний нөөцийн асуудалд онцгой анхаарч ажилладаг талаар мэдээлэл өглөө.
Аймгийн хэмжээнд жилд 90-100 хүн сүрьеэгээр өвчилж 2022 оны эхний 9
сарын байдлаар 51 хүн сүрьеэгийн диспансерийн хяналтад байна. Мөн эмэнд
тэсвэртэй сүрьеэ өвчнөөр 9 хүн эмчлүүлж байна.
