Улаанбаатар
Японы түүхэнд анх удаа эмэгтэй хүн адмирал цол хүртжээ
ДЭЛХИЙН МЭДЭЭ | НИЙГЭМ
ТОКИО, 2023 оны арванхоёрдугаар сарын 15 /NHK/. Японы Батлан хамгаалах яам тус улсын түүхэнд анх удаа Тэнгисийн цэргийн хүчний адмирал хэмээх дээд цолыг эмэгтэй хүнд олгох шийдвэр гаргажээ.
Уг цолыг өдгөө 57 настай Кондо Нацуэ гэдэг эмэгтэйд олгосон бөгөөд өмнө нь дэд адмирал цолтой байсан тэрбээр Тэнгисийн цэргийн дээд командлалын бие бүрэлдэхүүнийг бэлтгэх сургуулийг удирдаж байжээ. К.Нацуэ одоо Японы эргийн хамгаалалтын хүчний командлагчаар томилогдох ажээ.
Одоогоор тус улсын хуурай замын ба агаарын цэргийн хүчинд алба хаадаг эмэгтэйчүүд генерал хэмээх хамгийн дээд цолыг хүртээгүй байна.
Японы Батлан хамгаалах яам Зэвсэгт хүчний командлалын бие бүрэлдэхүүн дэх эмэгтэйчүүдийн тоог нэмэгдүүлэх хөтөлбөрийг хэрэгжүүлж байгаа бөгөөд 2025 он гэхэд хошууч болон түүнээс дээш цолтой офицер, генералуудын 5-аас доошгүй хувийг эмэгтэй албан хаагчид бүрдүүлэх ёстой.
2018 оны гуравдугаар сард түүхэнд анх удаа нэгдүгээр зэргийн ахмад Азума Рёко Японы нисдэг тэрэг тээвэрлэгч “Изүмо” зэрэг байлдааны дөрвөн хөлөг онгоцноос бүрдэх бүлгийг командлахаар томилогдож байв.
