Улаанбаатар
Газар хөдлөлтийн үед хэрэгжүүлэх зөвлөмж хэвээр байна
ДЭЛХИЙН МЭДЭЭ | БАЙГАЛЬ ОРЧИН
ТОКИО, 2024 оны наймдугаар сарын 12 /NHK/. Нанкай хагарлын орчимд
хүчтэй газар хөдлөлт болох магадлал байсаар байгаа тул болзошгүй аюулд бэлэн
байхыг Японы Цаг уурын удирдах газраас иргэдэд анхааруулсаар байна.
Японы өмнөд нутгийн Миязаки мужид
пүрэв гарагт 7,1 магнитудын хүчтэй газар хөдлөлт болсны дараа тус газраас
гаргасан зөвлөмж хүчинтэй хэвээр байгааг сануулжээ. Үүний сацуу газрын хөрсний байдалд ноцтой өөрчлөлт гараагүй
гэдгийг Цаг уурын газрын төлөөлөгчид мэдэгдлээ.
Пүрэв гарагт болсон газар хөдлөлтийн
улмаас цунами үүсэж, Кюшү, Сикокү мужуудын эрэгт хүрсэн байна. Миязаки хотын
нэгэн боомтод 50 см өндөртэй цунами ажиглагджээ. 5+ гэсэн үзүүлэлттэй газрын
дорх чичирхийлэл Миязаки болон хөрш зэргэлдээ Кагошима мужид, -6 гэсэн үзүүлэлттэй чичирхийлэл Нитинан
хотод бүртгэгдсэн байна.
Нанкай хагарлын орчимд хүчтэй
газар хөдлөлт дахин болох
магадлал ердийнхөөс өндөр байгааг Цаг уурын албанаас сэрэмжлүүлсээр байгаа
бөгөөд бэлэн байдлыг хангах тухай онцгой
зөвлөмжийг гаргасан билээ. Гэхдээ
газар хөдлөлт тодорхой цаг хугацаанд болно гэдгийг зөвлөмжид заагаагүй бөгөөд Токиогийн
бүс нутгаас өмнө зүгт орших Окинава арал хүртэлх 29 мужид гамшгийн үеийн бэлэн
байдлыг шалгахыг зөвлөжээ.
Бага насны хүүхдүүд, өндөр настнууд, хөгжлийн бэрхшээлтэй хүмүүс бүхий айл
өрхүүдэд хандан сайн дураараа нүүн шилжихийг зөвлөж байна.
