Улаанбаатар
ЗАВХАН: Отгон суманд өнөө шөнө -48.8 градус хүрэх төлөвтэй байна
ОРОН НУТГИЙН МЭДЭЭ | ЗАВХАН
Улиастай, 2025 оны нэгдүгээр сарын 25 /МОНЦАМЭ/. Завхан аймгийн Отгон суманд энэ сарын 25-26-нд шилжих шөнө -48.8°С байх төлөвтэй байна.
2024 оны агаарын хамгийн бага температурын утга -48.8 градусын хүйтэн Завхан аймгийн Отгон суманд нэгдүгээр сарын 23-нд ажиглагдаж байсан. Энэ температур өнөө шөнө тус бүс нутгаар дахин хүрэх урьдчилсан төлөвтэй байна.
Ойрын гурав хоногт хэт
хүйтэрнэ. Ихэнх нутгаар 25-27-ны өдрүүдэд хүйтний эрч чангарч Идэр, Тэс, Буянт голын хөндийгөөр шөнөдөө -42-47 градус, өдөртөө -31-36 градус
байна.
Хангайн уулархаг нутгаар шөнөдөө -36-41 градус, өдөртөө -25-30 градус хүрч хүйтрэн, зарим газраар салхи түр зуур секундэд 12-14 метр хүрч ширүүсэх төлөвтэй байгааг аймгийн Цаг уур орчны шинжилгээний газраас мэдээллээ.
Тиймээс галлагаа ихсэж гал түймэр гарч болзошгүй тул пийшин, зуухны аюулгүй байдлыг хангаж, цахилгаан халаагуурыг олон цагаар залгахгүй байх. Мэргэжлийн байгууллагаас өгч буй заавар зөвлөмжийг дагаж мөрдөх.
Хэт хүйтэн нөхцөлд дизель хөдөлгүүртэй автомашины түлш нь зарцаж явах боломжгүй болж байгаа тул бензин хөдөлгүүртэй автомашинтай хол замд зорчихгүй байх.
Малчид малаа ойрын хариулга маллагаанд байлгаж өндөр настан, бага насны хүүхдийг малд явуулахгүй байх.
Хол ойрын замд зорчихдоо аль болох өдрийн цагаар явж шөнийн цагт хөдөлгөөн үйлдэхгүй байхыг онцгойлон анхааруулж байна
гэж Завхан аймгийн Онцгой байдлын газраас мэдээлэв.
Сонирхуулахад, 2024 оны 12 дугаар сард агаарын температурын үнэмлэхүй их утга Булганы Тэшиг суманд 3.4°С байсан. Харин үнэмлэхүй бага утга Завханы Отгон суманд -48.8°С хүрч байсан байна.
Хөрсний температурын үнэмлэхүй Говь-Алтайн Тоорой суманд 14°С,
үнэмлэхүй бага утга Завханы Цэцэн-Уул суманд -45°С хүрч хүйтэрсэн байна
