Улаанбаатар
ДАРХАН-УУЛ: Алтан унаганы эзнээр Х.Баттөр, Н.Бадамцэцэг нар тодорчээ
ОРОН НУТГИЙН МЭДЭЭ | ДАРХАН-УУЛ
Дархан, 2025 оны дөрөвдүгээр сарын 2 /МОНЦАМЭ/. Таван эрдэнэ нэвтрүүлгийн нэрэмжит “Алтан төлийн эзэн”-ийг хавар мал төллөх цагаар тодруулж, алдаршуулдаг уламжлалтай. Дархан-Уул аймгийн Засаг дарга энэ жилийн алтан төлийн эздэд шагнал гардуулж, талархал хадгалуулав.
Хаврын дунд сарын билэгт сайн өдөр Хонгор сумын малчин Х.Баттөр, Н.Бадамцэцэг нар “Алтан унаганы эзэн”-ээр тодорч шагналаа орон нутгийн удирдлагуудаас гардан авлаа.
Х.Баттөрийн гэр бүл 24 жил мал маллаж буй туршлагатай малчин өрх бөгөөд мал маллах арга, туршлага, байгаль цаг уур, бэлчээрийн даацад тохируулан мал сүргээ чанаржуулж эрчимжүүлэх, малыг эдийн засгийн эргэлтэд оруулж сүргийн зохистой бүтцийг бүрдүүлэх зорилго тавин ажиллаж байна.
Мал маллах арга ухаанд суралцуулах, ажлын байраар хангах зорилгоор дөрвөн иргэнийг түр, хоёр өрхийн дөрвөн иргэнийг байнгын ажлын байраар ханган ажиллаж байна.
Үндэсний өв соёлыг түгээн дэлгэрүүлэх үйлсэд хувь нэмрээ оруулж 2023, 2024 онд Дархан-Уул аймгийн Засаг даргын нэрэмжит аймгийн аварга шалгаруулах “Адуучин тэмцээн”-ийг хамтран, өөрийн адуун сүрэгт зохион байгуулсан юм.
Ташрамд, уг шагнал нь “Таван эрдэнэ” нэвтрүүлгийн нэрэмжит бөгөөд МҮОНРТ, ХХААХҮЯ-тай хамтран шалгаруулдаг уламжлалтай.
