Улаанбаатар
Цас богийн хар турууны хэмжээтэй нэмэгдлээ
ОРОН НУТГИЙН МЭДЭЭ | БУЛГАН
Булган аймгийн хойд хэсгээр өнгөрсөн 7 хоногт орсон цас богийн хар турууны хэмжээтэй байлаа.
Тус аймгийн хойд бүсийн сум болох Тэшиг, Хангал, Бугат суманд 22-26 см зузаан цастай байна. Тэшиг, Хангал, Сэлэнгэ, Бугат, Хутаг-Өндөр суманд орсон цас нь доошоо сууж хатуурсаны улмаас малын ам, хөл халцарч доголж, бэлчээрт гарах боломжгүй болсноос шалтгаалан мал өлдөж, муудаж хорогдож байна. Он гарсаар Тэшиг суманд 203, Орхон суманд 730 толгой мал хорогджээ.
Цас ханзарч цаг тавирах болоогүй байхад бэлтгэсэн өвс тэжээлээ дуусч байгаа айл өрх олон байгаа аж. Орхон сум сумын аюулгүй фондын өвсний 90 хувийг зарцуулсан, Сэлэнгэ суманд 21 өрх бэлтгэсэн өвсөө дууссан, Тэшиг суманд бэлтгэсэн хадлангийн хашаа нь хоосорч байгаа малчдын тоо нэмэгдэх хандлагатай байгаа мэдээ байна.
Энэ сард цаг агаарын урьдчилсан мэдээгээр ихэнх нутгаар цас орох төлөвтэй.
М.Батжаргал
