Улаанбаатар
Гэмт хэрэг, зөрчлөөс урьдчилан сэргийлэх зорилгоор хууль, хүчний байгууллагын хамт олон Түнэл суманд ажиллав
ОРОН НУТГИЙН МЭДЭЭ | ХӨВСГӨЛ
Хөвсгөл аймгийн Иргэдийн төлөөлөгчдийн хурлын дэргэдэх гэмт хэргээс урьдчилан сэргийлэх ажлыг зохицуулах салбар зөвлөлийн гишүүдийн хамтарсан баг орон нутагт гэмт хэргээс урьдчилан сэргийлэх ажлын хүрээнд Мөрөн сумтай хамгийн ойр учраас малын хулгай, байгаль орчны эсрэг гэмт хэрэг их гардаг Түнэл суманд ажиллаж иргэдэд мэдээ, мэдээлэл зөвлөгөө өгөв.
Энэ үеэр Хөвсгөл аймгийн Захиргааны хэргийн анхан шатны шүүхийн ерөнхий шүүгч Б. Энхтайван Захиргааны хэргийн шүүхийн үйл ажиллагаа, онцлог чиг үүргийн тухай, Иргэний хэргийн шүүхийн ерөнхий шүүгч Л.Эрдэнэбат иргэн шүүхийн байгууллагад хэрхэн хандах тухай мэдээлэл, зөвлөгөө, ерөнхий шүүгч Т.Хүрэлбаатар шүүхийн бүтэц зохион байгуулалт ил тод нээлттэй байдлын тухай, Цагдаагийн газрын төлөвлөлт зохион байгуулалтын тасгийн дарга цагдаагийн дэд хурандаа Д.Уртбаяр Цагдаагийн газраас энэ онд хийж хэрэгжүүлэх ажлын төлөвлөгөө, баримталж байгаа бодлогын талаар танилцууллаа.
Мөн Шүүхийн шийдвэр гүйцэтгэх албаны хорих 443-р ангийн дарга хурандаа Ж.Батмөнх Хорих байгууллагын бүтээн байгуулалт, ялтан хоригдогчийн эрүүл аюулгүй байдлыг хангах, хууль журмаар оногдох эрхийг эдлүүлж буй талаар БОАЖГ-ын дарга Жаргалсайхан тус газраас хийж хэрэгжүүлж байгаа ажил, цаашдын бодлогын талаар Аймгийн прокурор хууль цаазын итгэмжит зөвлөх Н.Ганболд Түнэл суманд үйлдэгдсэн гэмт хэргийн гаралт шалтгаан гэр бүлийн хүчирхийллийн хууль, ГБХЗХГ-ын дарга Дашбаяр гэр бүлийн хууль хүүхдийн эрхийн тухай, өмгөөлөгчдийн зөвлөлийн дарга өмгөөлөгч Б.Батдорж иргэдэд өмгөөлөх үйлчилгээ хэрхэн үзүүлэх талаар мэдээллийг иргэдэд өгч харилцан ярилцаж хамтран ажиллав.
Түнэл суманд 2015 онд улсын дугаар авсан 36 гэмт хэрэг гарсан бол 2016 онд 33 болж буурсан үзүүлэлтэй байгаа бөгөөд цаашид тус суманд гэмт хэргийн гаралт буурах, гэмт хэрэггүй жишиг сум болоход дээрх байгууллагуудын иргэдэд өгсөн мэдлэг мэдээлэл цаашдын хамтын ажиллагаа чухал нөлөөлнө гэж үзэж байгаа ажээ.
Иргэдэд мэдээ мэдээлэл өгсөний дараа “Мөнгөн өвөл цас, мөс”-ний баярын арга хэмжээг нутгийн иргэдтэй хамтран зохион байгуулж өдөрлөгийн арга хэмжээнд нийт 12 баг өрсөлдсөнөөс багийн нийлбэр дүнгээр нэгдүгээр тэргүүн байранд Түнэл сумын Д. Цогбаяр ахлагчтай Бурхант баг, дэд байранд Д. Уртбаяр ахлагчтай Хөвсгөл аймгийн Цагдаагийн газрын багийн бие бүрэлдэхүүн, гуравт Л.Очирсүрэн ахлагчтэй Хилийн цэргийн 0257-р ангийн хамт олон шалгарч бусдыгаа хошуучилжээ.
Б.Гантуяа
