Улаанбаатар /МОНЦАМЭ/. Монгол Улсын Ерөнхийлөгчийн зарлигаар, Чингис хааны одонт хөгжмийн зохиолч Б.Шарав, төрийн хошой шагналт Н.Жанцанноров,  УБТЗ-ын хүндэт төмөр замчин Н.Ширнэндугар, гавьяат барилгачин Б.Рагчаа нарыг Хөдөлмөрийн баатар цолоор шагнаж, Сүхбаатар одонгоор энгэрийг нь мялаав.

Тулгар төрийн 2228, Их Монгол улс байгуулагдсаны 813 жил, Үндэсний эрх чөлөө тусгаар тогтнолоо сэргээн мандуулсны 108 жил, Ардын хувьсгалын 98 жилийн ой, Үндэсний их баяр, наадмыг тохиолдуулан Монгол Улсын Ерөнхийлөгч Х.Баттулга зарлиг гаргаж, Хөдөлмөрийн баатар 4, Гавьяат цолоор 50 орчим хүнийг шагнажээ. 

Шагнал гардуулах үеэр Монгол Улсын Ерөнхийлөгч Х.Баттулга, "Үндэсний их баяр наадмын өмнө уламжлал ёсоор эрхэлсэн ажил бүтээлээрээ манлайлсан хүмүүст төрийн цол,одон гардуулдаг. Өнөөдөр Хөдөлмөрийн баатар цол хүртэж байгаа Б.Шаравын бүтээлийг Монголын төр удаа дараа үнэлж, төрийн шагнал, Чингис хааны одон зэргийг гардуулж байсан.

Түүний хөгжмийн бүтээл нь Монголын хилээс хальж, дэлхий дахинаа дуурсах болсныг олон түмэн мэдэх биз ээ. Монголын уртын дууны өв уламжлалд тулгуурлан бүтээсэн "Замбуу тивийн наран" магтуу зохиолыг нь 1985 онд ЮНЕСКО-гийн хөгжмийн сан хөмрөгт бүртгэж, хоёрдугаар симфони нь дэлхийн хөгжмийн урлагт цоо шинэ үзэгдэл хэмээгдэж байсан юм.

Төрийн хошой шагналт Н.Жанцанноров нь Монголын хөгжмийн урлагт шинэчлэл хийсэн, үндэсний хэв маягийг орчин цагийн аястай уялдуулан бүтээл туурвидаг. Тэрээр Монголчуудын өвийг ЮНЕСКО-д бүртгүүлэх, дэлхий дахинаа монголын соёл урлагийг түгээн таниулах, нийгмийг соён гэгээрүүлэх, тархан суусан Монгол түмний хэлхээ холбоог гүнзгийрүүлэх ажилд онцгой зүтгэл гаргасныг цохон тэмдэглэж байна. 

Монгол Улсын Хилийн бүрэн бүтэн байдлыг хангах 8252 км шугамыг тогтоон тэмдэглэж, газрын зургаар баталгаажуулж, НҮБ-аар тодотгох ажлыг хийж байсан, 1970 онд Геодизи зураг зүй, газар зохион байгуулалт, кадастрын албыг үүсгэн байгуулж, олон жил удирдан чиглүүлж, олон зуун мэргэжилтэн бэлтгэсэн Б.Рагчаад мөн Хөдөлмөрийн баатар цол олголоо.

Мөн "УБТЗ" ХНН-ийн галт тэрэгний төмөр замын хөдөлгөөний аюулгүй ажиллагааг найдвартай хангаж, онцгой идэвх зүтгэл гарган хөдөлмөрлөсөн Монгол Улсын хүндэт төмөр замчин, гавьяат тээвэрчин Н.Ширнэндугар хөдөлмөрийн баатар цол хүртээлээ" хэмээв.

Мөн тэрээр боловсрол, соёл урлаг, спорт, эрүүл мэнд, шинжлэх ухаан, мал аж ахуй, дэд бүтэц, зам тээвэр, аж үйлдвэрийн салбарт олон жил үр бүтээлтэй ажилласан дараах нэр бүхий хүмүүст Монгол Улсын гавьяат цол олгосон юм.

Аж үйлдвэрийн гавьяат ажилтан цолоор, “Хасу эрчим” ХХК-ийн захирал Бадрахын Бат-Эрдэнэ, “ЧБНБ” ХХК-ийн захирал Гүржавын Чинбат, “Эрдэнэт үйлдвэр” ТӨҮГ-ын ажлын албаны Гадаад харилцаа хариуцсан зөвлөх Ядамжавын Пүрвээ, 

Шинжлэх ухааны гавьяат зүтгэлтэн цолоор, МУИС-ийн Нийгмийн шинжлэх ухааны сургуулийн археологи-антропологийн тэнхимийн багш Диймаажавын Эрдэнэбаатар, МУИС-ийн Цөмийн физикийн судалгааны төвийн эрдэм шинжилгээний ажилтан Гончигдоржийн Хүүхэнхүү,

Гавьяат багш цолоор, МУИС-ийн дэргэдэх Австралийн тэтгэлэгт сургалтын Монголын талын захирал Лувсанвандангийн Маналжав, ШУТИС-ийн багш Баянжаргалын Цэрэндорж, Хөвсгөл аймгийн Мөрөн сумын Ерөнхий боловсролын 1 дүгээр сургуулийн ахмад багш Ядамсүрэнгийн Бямбаа, Нийслэлийн Багануур дүүргийн Ерөнхий боловсролын “Боловсрол” цогцолбор сургуулийн багш Батаагийн Балжинням, Нийслэлийн Баянгол дүүргийн УССТ-ийн захирал Лувсанжамцын Баттулга, ШУТИС-ийн багш Чойжилийн Даваасамбуу, Өвөрхангай аймгийн Гучин-Ус сумын ахмад багш Сосорын Пүрэв, “Гурван эрдэнэ” багшийн дээд сургуулийн захирал Чойжилсүрэнгийн Жачин,

Гавьяат барилгачин цолоор, “Бэлийн цахир” ХХК-ийн захирал Тугалын Мягмар, Архангай аймгийн “Гурван тамир” ХХК-ийн захирал Жийлээгийн Нэргүй, “Нео трейд” ХХК-ийн зөвлөх инженер Жамцын Галиндэв,

Гавьяат дасгалжуулагч цолоор, Монголын уулчдын үндэсний холбооны дасгалжуулагч Жамсрангийн Баянцагаан,

Гавьяат хуульч цолоор, Монгол хурандаа нийгэмлэгийн нарийн бичгийн дарга, бэлтгэл хурандаа Цоодолын Алтанцэцэг,

Гавьяат жүжигчин цолоор, Үндэсний урлагийн их театрын уртын дуучин Ганхуягийн Энхбаатар,

Монголын кино үйлдвэрийн ахмад ажилтан, жүжигчин Даваагийн Сүхбаатар, Дуурийн дуучин Энхболдын Анхбаяр, Үндэсний дуу бүжгийн “Түмэн-Эх” чуулгын дуучин Гомбодоржийн Бямбажаргал,

Гавьяат мал зүйч цолоор, Говьсүмбэр аймгийн Сүмбэр сумын ахмад настан, малзүйч Түвдэнгийн Ваанчиг,

Гавьяат малын эмч цолоор, Улсын мал эмнэлгийн ариун цэврийн лабораторийн ахмад ажилтан Жигжидийн Дамдинсүрэн,

Гавьяат механикжуулагч цолоор, “Ургацын ундраа” ХХК-ийн захирал Лүүлүүгийн Ганболд,

“Орги тариа” ХХК-ийн захирал Цоодолын Тогоодой,

Гавьяат тамирчин цолоор Монголын хөнгөн атлетикийн холбооны ахмад тамирчин Төмөрбатын Цэрэндолгор, Монголын хөлбөмбөгийн холбооны дэд ерөнхийлөгч Болдын Буман-Учрал,

Гавьяат тээвэрчин цолоор, “УБТЗ” нийгэмлэгийн засварын машинт станцын ахмад ажилтан Доржийн Пүрэвжав, Дорноговь аймгийн Сайншанд сумын ахмад настан Нансалын Баасанжав, Хэнтий аймгийн Хэрлэн сумын ахмад настан, ахмад тээвэрчин Жанцангийн Агваанцэрэн, Нийслэлийн Сонгинохайрхан дүүргийн 5 дугаар хорооны ахмад настан Батхүүгийн Жигжидсүрэн, УБТЗ нийгэмлэгийн зорчигчийн вагон депогийн галт тэрэгний дарга Гомбын Гал-Эрдэнэ, Гавьяат уурхайчин цолоор Орхон аймгийн Баян-Өндөр сумын иргэн, ахмад уурхайчин Юнгэрээгийн Цэдэнбал, “Баялаг-Орд” ХХК-ийн захирал Дашийн Чулуунбаатар, “Их наяд” ХХК-ийн ахлах аудитор Чүлтэмийн Өлзийсайхан, Ховд аймгийн “Ой ан интернэшнл” ХХК-ийн захирал Дагвын Жүгдэрбарам, “Блью планет” ХХК-ийн зөвлөх Цэвгээгийн Тогтохбаяр,

Хүний гавьяат эмч цолоор, Хэнтий аймгийн сум дундын эмнэлгийн их эмч Ядамдоржийн Дарьбазар, Улсын гуравдугаар төв эмнэлгийн зүрхний мэс заслын эмч Цэднээгийн Даваацэрэн,

Гавьяат эдийн засагч цолоор, Дархан-Уул аймгийн “Зөв сонголт зөв удирдлага” ТББ-ын тэргүүн Нэмэхийн Бэрцэцэг, Баян-Өлгий аймгийн Нэгдсэн эмнэлгийн зөвлөх эмч Буланы Бейсен, Соёлын гавьяат зүтгэлтэн цолоор Үндэсний архивын газрын ахмад ажилтан Цагааны Дүүдий, Монголын орчуулагчдын  эвлэлийн гишүүн, орчуулагч, сэтгүүлч Цэвэгжавын Цэрэн, Үйлчилгээний гавьяат ажилтан цолоор Хөвсгөл аймгийн Онцгой байдлын газрын аврагч Хөх-Өвгөний Мөнхбат, Сүхбаатар аймгийн Баруун-Урт сумын ахмад настан Болдын Сүхбаатар,

Эрүүлийг хамгаалахын гавьяат ажилтан цолоор, Монголын эм зүйчдийн байгууллагуудын холбооны гүйцэтгэх захирал Жамсрангийн Рэнцэн-Амгалан нарыг тус, тус шагналаа.

Мөн боловсрол, соёл урлаг, спорт, эрүүл мэнд, шинжлэх ухаан, мал аж ахуй, дэд бүтэц, зам тээвэр, аж үйлдвэрийн салбарт олон жил үр бүтээлтэй ажилласан хүмүүсийн төлөөлөн болгон, Сүхбаатарын одонгоор Нийслэлийн Багануур дүүргийн өндөр настан Гочоогийн Аюурзана Хөдөлмөрийн гавьяаны улаан тугийн одонгоор Нийслэлийн Сонгинохайрхан дүүргийн 27 дугаар хорооны ахмад настан Гүнрэгжавын Отгонбаяр, Алтангадас одонгоор Нийслэлийн Баянгол дүүргийн Цагдаагийн 2 дугаар хэлтсийн эрүүгийн төлөөлөгч Тилеубердын Сайфолла, Хөдөлмөрийн хүндэт медалиар Нийслэлийн Чингэлтэй дүүргийн 18 дугаар хорооны иргэн Сүрэнжавын Алтантулга нарыг шагнав.