Ulaanbaatar
ХОВД: Энэ долоо хоногийн цаг агаарын урьдчилсан төлөв
ОРОН НУТГИЙН МЭДЭЭ | ХОВД
Жаргалант, 2024 оны арванхоёрдугаар сарын 9 /МОНЦАМЭ/. Ховд аймгийн Ус, цаг уур, орчны шинжилгээний төвөөс энэ сарын 16-ны өдөр хүртэлх цаг агаарын урьдчилсан төлөв мэдээллийг танилцууллаа.
Энэ долоо хоногт зарим газраар цас орж, нийт нутгаар хүйтний эрч чангарна.
Энэ сарын 10-нд ихэнх нутгаар, энэ сарын 11-нд зарим газраар бага зэргийн цас орно.
Салхи энэ сарын 11, 12, 16-нд зарим газраар секундэд 5-10 метр, алтайн салбар уулсаар секундэд 12-14 метр байх төлөвтэй. Харин бусад хугацаанд салхи нийт нутгаар секундэд 3-8 метр байна.
Агаарын температурын хувьд алтайн өвөр говиор шөнөдөө -20-25 градус, өдөртөө -9-14 градус хүйтэн, бусад нутгаар -26-31 градус, өдөртөө -15-20 градус хүйтэн байх төлөвтэй.
Өнөө шөнө болон маргааш өдөр ихэнх нутгаар цас орж, цасан шуурга шуурах, улмаар зам даваанд халтиргаа үүсэж болзошгүй тул иргэд хол ойр зорчихдоо аюулгүй байдлаа сайтар хангаж, болзошгүй эрсдэлээс сэрэмжтэй байхыг Ховд аймгийн Ус, цаг уур, орчны шинжилгээний төвөөс анхаарууллаа.
Мөн энэ сарын 10-ны өдрөөс нийт нутгаар хүйтний эрч чангарах төлөвтэй.
