Ulaanbaatar
ДАРХАН-УУЛ: Нарсан ой тэлэх ойжуулалтын ажил хийлээ
ОРОН НУТГИЙН МЭДЭЭ | ДАРХАН-УУЛ
Дархан, 2023 оны аравдугаар сарын 18 /МОНЦАМЭ/. Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөн, “Дархан Дархан-2032” хөтөлбөрийн хүрээнд Зулзагын голын нарсан ойг тэлэх ойжуулалтын ажлыг өнөөдөр зохион байгууллаа.
Орон нутгийн төсвийн хөрөнгөөр хашаажуулсан 4.8 га талбайд 2000 гаруй нарс тарихаар бэлтгэсэн аж. Модны бэлдэц, суулгацыг “Домогт шарын гол” ойн мэргэжлийн байгууллага хариуцан ажиллаж байна. Мод тарих ажилд аймгийн ОБГ, Юнител групп, Хонгор сумын ЗДТГ, уул, уурхайн компаниудын төлөөлөл хамрагдлаа.
Өнөөдөр нийт 1000 орчим нарс модны суулгацыг суулгаж усалгаа хийсэн бол цаашид тус талбайг нарс модоор дүүргэж гадна талд нь навчит мод тариалж хамгаалах ажээ.
Цаашид нарсан ой санг нэмэгдүүлэх, Сэлэнгэ аймагт бий болгосон төгөлтэй дүйцэхүйц хэмжээнд хүргэх зорилт дэвшүүлэн ажиллаж буйг аймгийн БОАЖГ-ын мэргэжилтэн У.Мөнхзул онцолж байлаа.
Дээрх байгууллагын ажилтан, алба хаагчдад “Домогт Шарын гол” ХХК-ийн захирал З.Оюунтуяа мод хэрхэн тарих, ургуулах аргачлалыг танилцуулж заавар зөвлөмж өглөө. Мод тарих маш амархан. Харин түүнийг арчилж ургуулна гэдэг маш том хариуцлага байдаг. Тиймээс тарьсан модоо ургуулахын төлөө хүн бүхэн хичээх хэрэгтэйг сануулж байлаа.
Ташрамд мод тарих ажлыг "Домогт Шарын гол" ХХК ойн мэргэжлийн байгууллага гүйцэтгэж байгаа бөгөөд өөрийн мод үржүүлгийн газарт үрээр ургуулсан 10-15 настай 2000 ширхэг нарс мод тарьж төгөл бий болгох юм.
