Гадаад харилцааны дэд сайд Бали-гийн Ардчиллын форумд оролцов

Монголын мэдээ | Улс төр
192@montsame.mn
2018-12-08 11:01:56

Улаанбаатар /МОНЦАМЭ/. “Хөгжил цэцэглэлтийн төлөөх ардчилал” сэдвийн хүрээнд болсон энэ жилийн Бали-гийн Ардчиллын форумын Ерөнхий хэлэлцүүлэгт Монгол Улсын Гадаад харилцааны дэд сайд Б.Батцэцэг оролцож, үг хэллээ.

Тэрээр хэлсэн үгэндээ ардчилал болон хөгжил цэцэглэлт нь хоорондоо харилцан хамааралтай бөгөөд Монгол Улс ардчиллын замыг сонгосон нь улс орондоо хөгжил цэцэглэлтийг цогцлоох хүчин чармайлтад томоохон хувь нэмэр болж байгааг тэмдэглээд өнөөгийн түвшинд хүрэхэд туулсан бэрхшээл, туршлагаас товч танилцуулсан байна.


Форумын үеэр Гадаад харилцааны дэд сайд Б.Батцэцэг Бүгд Найрамдах Индонез Улсын Гадаад хэргийн дэд сайд Др.Абдуррахман Мохаммад Фачиртай уулзаж, хоёр талын харилцаа, хамтын ажиллагааны талаар санал солилцов.

Бали-гийн Ардчиллын форум энэ удаа Индонез улсын Бали аралд 12 дугаар сарын 6-7-ны өдрүүдэд болсон юм.

Тодруулга: 11 дэх жилдээ зохион байгуулж буй Бали-гийн Ардчиллын форум нь бүс нутгийн энх тайван, тогтвортой байдал, хүний ​​эрхийг хангах, нэн ялангуяа эдийн засгийн өсөлт, улс төрийн хөгжил хоорондын тэнцвэртэй байдлыг хангахад хувь нэмрээ оруулах зорилгооор болдог юм.

Холбоотой мэдээ