Дэлхийн хамгийн хөөрхөн хүүхэд шалгаруулах тэмцээнд бүртгэж байна
МОНГОЛЫН МЭДЭЭ | СОЁЛ УРЛАГУлаанбаатар /МОНЦАМЭ/. “Little Miss & Little Mister United World” нэртэй 5-19 насны хөвгүүд, охидын дэлхийн мисс шалгаруулах тэмцээнд оролцох хүүхдүүдийг тав дахь жилдээ сонгон шалгаруулж байна. Эхний шатны шалгаруулалт хоёрдугаар сарын 21-ний өдөр эхлэх бол хоёрдугаар шатных нь ирэх сарын 10-нд болно. Сүүлийн шатны шилдэг оролцогчдод загварын алхааны хичээл, хувь хүнийг хөгжүүлэх сургалтыг үнэгүй заах юм.
Дээрх шалгаруулалтад Мисс, мистер, загвар өмсөгч болох сонирхолтой 5-19 насны эрэгтэй, эмэгтэй хүүхдүүд оролцох эрхтэй. Эхний шатны шалгаруулалтыг “Prince & Princess Miss Mongolia” пэйж хуудсанд онлайнаар хийж, оролцогч хүүхдүүд загварын алхаа, авьяасаа үзүүлсэн бичлэгээрээ оноогоо цуглуулна. Дэлхийн тэмцээнд оролцсон 5-19 миссүүдэд телевиз, дэлгэцийн салбарт өөрсдийгөө сорих, кино, клип, рекламд тоглон олон орны охидтой танилцан дэлхийн үе тэнгийхнээсээ суралцах боломж олдоно.
Дэлхийн хамгийн нэр хүндтэй өсвөрийн миссийн тэмцээн болох “Little Miss & Little Mister United World”-ийн Монгол Улс дахь албан ёсны төлөөлөгчөөр Олон улсын шүүгч Ч.Энхжаргал ажилладаг юм байна. Дэлхийн мисст оролцон эх орноо сурталчлах хамгийн хөөрхөн хүүхдүүд ирэх есдүгээр сард Испани улсыг зорих юм.