Тост, Тосон бумбын нурууны хамгаалалтын хилийн зурвасыг нарийвчлан тусгах шаардлагатай
МОНГОЛЫН МЭДЭЭ | УЛС ТӨРУИХ-ын гишүүн Ц.Даваасүрэн энэ долоо хоногт хэлэлцэх хуулийн төслүүд дээр бие даагчид ямар байр суурь илэрхийлэхээ мэдэгдэж өнөөдөр Төрийн ордонд хэвлэлийн бага хурал хийлээ.
Өмнөговь аймгийн Гурвантэс сумын нутаг дахь Тост, Тосон бумбын нурууг улсын хамгаалалтад авах хуулийн төслийн анхны хэлэлцүүлгийг чуулганы энэ долоо хоногийн хуралдаанаар хийнэ. Бие даагч гишүүд уг хуулийн төслийг дэмжиж байгаа бөгөөд харин хуулийг батлахдаа тусгай хамгаалалтад авах хилийн заагийг УИХ-аас тусгайлан зааж өгөх ёстой гэж үзэж байна.
Үүнээс гадна Боловсролын тухай хуульд өөрчлөлт оруулах хуулийн төслийг дэмжиж байгаагаа Ц.Даваасүрэн гишүүн хэллээ. Тус хуулийн төсөлд залуу малчны 6 настай хүүхдийг сургуульд оруулалгүй чөлөөлдөг байх заалт туссан юм. УИХ-ын гишүүдийг орон нутагт ажиллах үеэр хөдөөгийн иргэдээс энэ асуудлыг ихээр хөнддөг байна. Тиймээс хуулийн төслийг батлахдаа багшийн хувьсах зардлыг тусгах шаардлагатай гэв.
Энэ удаагийн хаврын чуулганаар Ерөнхийлөгчөөс өргөн мэдүүлсэн батлан хамгаалахын салбартай холбоотой багц хуулийн төслүүдийг хэлэлцэхээр төлөвлөсөн. Сонгуулийн уур амьсгал бүрэлдсэн энэ үед парламент бодитой хэлэлцэх болов уу гэдэгт тэдгээр гишүүд эргэлзэж байгаа аж. Тиймээс сонгуулийн дараа бүрдэх парламент хэлэлцэх нь зүйтэй. Одоогийн түвшинд зөвхөн тус хуулийн төслүүдийн хэлэлцэх эсэх хэлэлцүүлгийг хийх нь оновчтой гэв.
Түүнчлэн Монгол Улсын эдийн засаг, нийгмийг 2015 онд хөгжүүлэх үндсэн чиглэлийн биелэлтийг чуулганы энэ 7 хоногийн хуралдаанаар хэлэлцэхээр товд орж ирсэн. УИХ-ын гишүүн Ц.Даваасүрэн парламент үндсэн чиглэлийн биелэлтийг хангалтгүй хэлэлцэж ирсэн. Энэхүү баримт бичигт иргэд хяналт тавьдаг байх хэрэгтэй. Том төслүүд хөдөлж байна гэдэг боловч манай улсын эдийн засаг, нийгэмд өгөөжөө өгөхгүй байна. Өөрөөр хэлбэл эдийн засгийн бодит нөхцөл байдлыг энэ үеэр ярих ёстой гэж тэрбээр ярьлаа.
Б.Туул