Цахим хэрэглээг бууруулж хүүхэддээ үлгэр ярьж өгөхийг уриалав

Монголын мэдээ | Боловсрол
bolor@montsame.mn
2019-11-11 08:33:04

Улаанбаатар /МОНЦАМЭ/. Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газар, Нийслэлийн Гэр бүл хүүхэд залуучуудын хөгжлийн газраас  2019 оны 11 дүгээр сарын 11-ний өдрийг “Үлгэрч ээж, аавуудын өдөр” болгох уриалга гаргалаа.

Монгол Улсын Засгийн газраас 2019 оныг "Иргэн төвтэй төрийн үйлчилгээ"-ний жил болгон зарласантай холбогдуулан нийт 894.496 өрх үдэш бүр хүүхэддээ үлгэр ярьж өгөхийг уриалах юм.

Үлгэрч ээж аавуудын өдрөөр ЕБС-ийн нийт 593.200 сурагч, цэцэрлэгийн 261.354 хүүхэд ээж аав, ах эгчдээ үлгэр ярьж өгөхийг хүссэн захидал бичиж оролцох бөгөөд фэйсбүүк хэрэглэгч бүр үлгэрийг сурталчлах, хэвлэл мэдээллийн байгууллага үлгэрээр эфирээ нээж хаах, үүрэн телефоны оператор компаниуд олон нийтэд зурвас явуулах, цаашид аймаг, нийслэлийн Гэр бүл, хүүхэд залуучуудын хөгжлийн газар, Залуучуудын хөгжлийн төвөөс Үлгэрч ээж аавуудын 1 сарын аян болгон өрнүүлнэ.

Судалгаанаас үзэхэд 2018 оны байдлаар Монгол Улсад үүрэн холбооны хэрэглэгч 3,886,167, дата хэрэглэгч 2,625,685, ухаалаг утас хэрэглэгч 2,439,236 мөн интернэт хэрэглэгчийн тоо 2,910,000 байна. Монгол Улсад 15-60 насны 10 хүн тутмын 8 нь буюу 1.7 сая хүн ямар нэг хэлбэрээр сошиал медиа ашиглаж байна. Сүүлийн 5 жилд 338 хүүхэд дэлгэцийн донтох өвчнөөс болоод сэтгэцийн эрүүл мэндийн төвд хандсан байна. Иймд цахим хэрэглээг бууруулж хүүхэддээ үлгэр ярьж өгөхийг залуучууд уриалж байна.

Хүүхэддээ өдөр бүр үлгэр ярьж өгснөөр 1. Хүүхдийн сэтгэн бодох чадвар сайжирна. 2. Орой унтахдаа утас, цахим тоглоом тоглох бус ном унших дадал хэвшил бий болно 3. Залуу гэр бүлийн гишүүдийн үүрэг хариуцлага нэмэгдэнэ. 4. Гэр бүлийн таатай уур амьсгалыг бүрдүүлнэ. 5. Хүүхэд өөрөө ном унших сонирхол, сэдэл төрөхөөс гадна ёс суртахуун, өв уламжлал, ураг, удмын боловсрол олгох, эх оронч сэтгэлгээг бий болгоход үлгэрийн ач холбогдол нэн чухал байна. 

Холбоотой мэдээ