Үндэсний олимпын академиудын удирдлагууд цахим уулзалт хийв

Монголын мэдээ | Спорт
dusem11@yahoo.com
2021-01-12 08:58:02

Улаанбаатар /МОНЦАМЭ/. Монгол, ОХУ, Украин, Болгар, Киргизийн Үндэсний олимпын академийн удирдах ажилтнуудын цахим өргөтгөсөн уулзалт-ярилцлага даваа гарагт боллоо.


Тус уулзалтад МҮОХ-ны Ерөнхийлөгч Н.Түвшинбаяр, Дэд ерөнхийлөгч Ч.Наранбаатар, ОХУ-ын олимпын төв академийн Ерөнхийлөгч Н.Ю.Мельникова, Европын ҮОА-иудын холбооны Дэд ерөнхийлөгч, Украины ҮОА-ийн Ерөнхийлөгч М.М.Булатова, Европын ҮОА-иудын холбооны дэд ерөнхийлөгч, Болгарын ҮОА-ийн Ерөнхийлөгч А.Митев болон Монголын үндэсний олимпын академи /МҮОА/, Монголын спортын дунд сургуулиудын удирдлагууд оролцлоо.


Уулзалтаар олон нийтэд олимпын боловсролыг түгээн дэлгэрүүлэх, олимпын хөдөлгөөнийг өрнүүлэх туршлагаас харилцан хуваалцаж, цаашдын хамтын ажиллагааг түлхүү өргөжүүлэх талаар санал солилцжээ.


Мөн цар тахлын үеэр олон улсад “Токио-2020” олимпын наадамд баг тамирчдаа хэрхэн бэлтгэж буй тухай болон олимпын боловсролын чиглэлээр хамтран сургалт-семинар зохион байгуулахаар болов.

Холбоотой мэдээ