МАН, АН-ын бүлгийн гишүүдийн хамтарсан Ажлын баг байгуулж ажлаа эхлэв

Монголын мэдээ | Улс төр
munkhbaatar@montsame.gov.mn
2021-05-11 13:17:32
@s_munkhbaatar

Улаанбаатар /МОНЦАМЭ/. УИХ дахь Монгол Ардын Намын болон Ардчилсан Намын бүлгүүдийн санал, улс төрийн зөвшилцөлд үндэслэн УИХ-ын дарга Г.Занданшатар захирамж гаргаж, Ажлын баг байгууллаа.


Ажлын багийн ахлагчаар УИХ-ын гишүүн Ц.Мөнх-Оргил, Дэд ахлагчаар УИХ-ын гишүүн Н.Ганибал нар ажиллах бөгөөд Ж.Батсуурь, Ц.Мөнхцэцэг, Ц.Сандаг-Очир, Ц.Туваан нарын гишүүн бүрэлдэхүүнд нь орсон байна.


Тус ажлын баг УИХ дахь Ардчилсан Намын бүлгийн гишүүд өлсгөлөн зарласнаас үүдсэн улс төрийн нөхцөл байдалтай холбогдуулан зарим хууль тогтоомжийн биелэлтийг хянан шалгах, санал дүгнэлт боловсруулах үүрэгтэй ажиллах юм.


Ажлын багийн анхны хуралдаан өнөөдөр болж, зохион байгуулалт, үйл ажиллагааны чиглэл, хамрах хүрээ, анхаарах асуудлын талаар санал солилцож, ажлын төлөвлөгөө гаргах, холбогдох байгууллагаас мэргэжлийн хүмүүсийг оролцуулж, мэргэжил, арга зүйн туслалцаа авах нь зүйтэй гэж үзэв.  

Холбоотой мэдээ