Гагнуурын электрод, Хүний экологийн төв, Будгийн үйлдвэрийг хувьчилна

Орон нутагт | Орхон
orkhon@montsame.mn
2021-07-21 16:59:20
oyuka_hu@yahoo.com

Орхон/МОНЦАМЭ/. “Эрдэнэт шинжлэх ухаан, технологийн парк” ОНӨААТҮГ-ын Гагнуурын электродын үйлдвэр, Хүний экологийн төв, Будгийн үйлдвэрийн 66 хувийг үйл ажиллагааны чиглэлийг нь өөрчлөхгүйгээр хувьчлах саналыг аймгийн ИТХ-ын төлөөлөгчид дэмжиж, Төрийн өмчийн бодлого, зохицуулалтын газартай зөвшилцөж эцсийн шийдвэрийг гаргахаар боллоо.

 

Тус парк нь сургалт, судалгаа шинжилгээ хийх, гарааны бизнесүүдийг гаргах, хөгжүүлэх, бойжуулах, технологи дамжуулах, бизнесийн зөвлөгөө өгөх зэрэг ажлыг хийдэг бөгөөд паркийн дэргэд гагнуурын электродын үйлдвэр, хүний экологийн төв, будгийн үйлдвэр байх нь бизнесийн зарчмаар үйл ажиллагаа явуулахад хууль, эрх зүйн хувьд хүндрэлтэй байгаа ажээ.

Гагнуур электродын үйлдвэрийг орон нутгийн төсвийн 145 сая төгрөгөөр 2017 онд байгуулж, олон төрлийн ган, нерж гагнах гурван нэр төрлийн электродын үйлдвэрийг ашиглалтад оруулсан. Энэ үйлдвэр нь хоногт 2 тонн гагнуурын электрод үйлдвэрлэх хүчин чадалтай. 2018-2020 онд 834.9 сая төгрөгийн орлого, 258,5 сая төгрөгийн цэвэр ашигтай ажилласан байна.

Хүний экологийн төв нь 2017 онд орон нутгийн төсвийн 142.3 сая төгрөгөөр биологийн сорьц буюу үсэнд сорилт хийх чиглэлээр  байгуулагдсан. Өнөөгийн хүчин чадлаар нэг жилд 1080 дээжид сорилт хийх боломжтой. 2019-2020 онд 90.6 сая төгрөгийн орлого олж, 26,5 сая төгрөгийн цэвэр ашигтай ажилласан аж.

Будгийн үйлдвэр нь орон нутгийн төсвийн 70 сая төгрөгөөр 2019 онд байгуулагдсан. Будгийн лаборатори нь хоногт 3 тонн бүтээгдэхүүн үйлдвэрлэх хүчин чадалтай. ЭКО хүний биед харшил өгөхгүй, үнэргүй, чанартай будаг үйлдвэрлэхэд 15-30 орц найрлагаас бүрдэх усан суурьтай эко будаг юм. 2019-2020 онд 23.1 сая төгрөг орлого, 877,9 мянган төгрөгийн цэвэр ашигтай ажилласан байна.

“Эрдэнэт шинжлэх ухаан, технологийн парк” ОНӨААТҮГ-аас тендер, сонгон шалгаруулалт зарлаж дээрх гурван үйлдвэрийн үнэлгээг бизнесийн үнэлгээний хараат бус компаниар хийлгэхэд гагнуурын электродын үйлдвэрийг 403.8 сая төгрөг, хүний экологийн төвийг 177.9 сая төгрөг, будгийн үйлдвэрийг 136.7 сая төгрөгөөр үнэлжээ.

Холбоотой мэдээ