Улаанбаатар
БНАСАУ Өмнөд Солонгосыг цөмийн зэвсгээр сүрдүүлжээ
ДЭЛХИЙН МЭДЭЭ | УЛС ТӨР
СӨҮЛ. /TASS/. Хэрэв БНСУ “цэргийн сөргөлдөөнийг сонговол” Пёньян цөмийн зэвсэг хэрэглэнэ гэж БНАСАУ-ын удирдагч Ким Жөн Уны дүү, Солонгосын Хөдөлмөрийн намын Төв Хорооны суртал, ухуулгын хэлтсийн орлогч дарга Ким Ё Жон мэдэгдсэнийг Солонгосын төв цахилгаан мэдээний агентлаг /KCNA/ уламжилжээ.
"Хэрэв биднийг өдөөн хатгахгүй бол бид хэзээ ч түрүүлж цохилт өгөхгүй. Бид Өмнөдийг гол дайснаа гэж үзэхгүй байна. Өмнөд Солонгосын Зэвсэгт хүчин бидний эсрэг цэргийн ажиллагаа явуулахгүй л бол тэд манай армийн байд тооцогдохгүй" гэж Ким Ё Жон хэлсэн байна.
"Хэрэв Өмнөд Солонгос цэргийн сөргөлдөөнийг сонговол манай цөмийн хүчин үүргээ биелүүлэхээс өөр аргагүй болно" гэж тэрбээр мэдэгдсэн байна. Солонгосын хойгийн оршин суугчид "нэг ард түмэн" тул Пёньян дайныг эсэргүүцэж байгааг Ким Ё Жон өмнө нь онцлон тэмдэглэж байв.
"БНАСАУ-д өрссөн цохилт өгөх улсынхаа чадварын талаар хэлсэн БНСУ-ын Батлан хамгаалахын сайд Со Укийн бодлогогүй үгсийн улмаас ноцтой аюул учирч болзошгүй" гэдгийг Ким Жөн Уны дүү Сөүлд ням гарагт анхааруулсан.
Тэрбээр Өмнөдийн Батлан хамгаалахын сайдын зүгээс БНАСАУ-д өрссөн цохилт өгөх талаар ярих нь "маш том алдаа" гэж онцлон тэмдэглэжээ.
Өнгөрөгч баасан гарагт БНСУ-ын Батлан хамгаалахын сайд мэдэгдэхдээ, “Хэрэв БНАСАУ пуужингаа Өмнөд рүү чиглүүлбэл манай цэргүүд Умардын пуужин харвах цэгүүд, командын объектуудад "оновчтой, хурдан" цохилт өгөх чадвартай” гэсэн байна.
