"Чингис хаан" одонг Жак Уэтерфорд, Д.Доржготов нарт хүртээнэ

МОНГОЛЫН МЭДЭЭ | УЛС ТӨР
btlnmn@yahoo.com
2022-11-23 10:37:53

Улаанбаатар /МОНЦАМЭ/. Монгол Улсын төрийн дээд шагнал, тэргүүн зэргийн "Чингис хаан" одонг энэ жил хэн гэх эрхэмд хүртээх болсныг зарлаж, Ерөнхийлөгчийн Тамгын газраас өнөөдөр Төрийн ордонд мэдээлэл хийлээ.


Ерөнхийлөгчийн Тамгын газрын дарга Я.Содбаатар энэ үеэр хэлэхдээ “Их эзэн Чингис хааны мэндэлсэний 860 жилийн ой энэ жил тохиож байна. Энэхүү ойн хүрээнд  Монгол Улсын төрийн дээд шагнал, тэргүүн зэргийн "Чингис хаан" одонг энэ жил хоёр хүнд гардуулахаар тогтсон. АНУ-ын эрдэмтэн, монгол судлаач Жак Уэтерфорд, ШУА-ийн Газар зүй, геоэкологийн хүрээлэнгийн эрдэм шинжилгээний тэргүүлэх ажилтан, академич, доктор, профессор Д.Доржготов нарт энэхүү одонг хүртээхээр тогтсон.


"Чингис хаан" одонг их эзэн Чингис хааны мэндэлсний ой буюу "Монгол бахархлын өдөр" жил бүрийн өвлийн тэргүүн сарын шинийн нэгэнд улс орныхоо тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэстний өмнө онцгой гавьяа байгуулсан иргэнийг шагнахаар журамласан.


Маргааш их эзэн Чингис хааны мэндэлсэн өдөр. Тус өдөр энэхүү нэр хүндтэй шагналыг гардуулах болно" гэлээ.


Холбоотой мэдээ