Улаанбаатар
Япон, Их Британи улсууд Африкт ашигт малтмал олборлоход хөрөнгө оруулна
ДЭЛХИЙН МЭДЭЭ | ЭДИЙН ЗАСАГ
ТОКИО. /Nikkei/. Япон, Их Британийн эрх баригчид Африкийн ашигт малтмал олборлох салбарт хамтарсан хөрөнгө оруулалт хийх механизмыг бий болгох боломжийг судалж байна гэж “Nikkei” сонин мэдээлжээ.
Тус сонины эх сурвалжийн мэдээлснээр, Японы Эдийн засаг, худалдаа, аж үйлдвэрийн сайд Нишимүра Ясүтошигийн энэ долоо хоногт Их Британид хийх айлчлалын үеэр холбогдох тохиролцоонд хүрч магадгүй байна. Тодруулбал, цахилгаан тээврийн хэрэгсэл үйлдвэрлэхэд, түүнчлэн байгаль орчинд ээлтэй бусад технологид чухал ач холбогдолтой кобальт, никелийн уурхайг хөгжүүлэх талаар яригдаж байгаа аж.
Эдгээр ашигт малтмалын хангамжийн хувьд Япон нь одоогоор хэд хэдэн орноос, түүний дотор Хятадаас хамааралтай байгаа юм. Шинэ гэрээ байгуулах замаар Япон болон Их Британи улсууд нийлүүлэлтийн эх үүсвэрээ төрөлжүүлэх зорилгоор ашигт малтмал олборлох газруудыг хамтран хайх, Африкт газрын тос боловсруулах үйлдвэр байгуулахаар төлөвлөж байна.
Үүнээс гадна, тус хоёр улс хагас дамжуулагч, зай хураагуур зэрэг чухал барааны хомсдолыг эрт илрүүлэх механизмыг бий болгоно гэж найдаж байна. Хоёр улсын Эдийн засгийн сайд нар цаг тухайд нь мэдээлэл солилцдог тогтолцоог бий болгосноор нийлүүлэлтийн сүлжээ тасалдаж болзошгүйд бэлтгэх болон асуудлыг шийдвэрлэхэд шаардлагатай арга хэмжээг авах боломжтой болох ажээ.
