Улаанбаатар
СҮХБААТАР: Томуу, томуу төст өвчний дэгдэлт нэмэгдэж байна
ОРОН НУТГИЙН МЭДЭЭ | СҮХБААТАР
Баруун-Урт 2023
оны арванхоёрдугаар сарын 8 /МОНЦАМЭ/. Аймгийн Нэгдсэн эмнэлгийн Хүүхдийн тасгаас томуу, томуу төст өвчний нөхцөл байдал болон
өвчнөөс урьдчилан сэргийлэх зөвлөмжийг өгч байна. Учир нь аймгийн хэмжээнд
томуу, томуу төст өвчний дэгдэлт ихэсч, хүүхдийн тасагт нэмэлтээр 10 ор
дэлгэжээ.
2023
оны 49 дэх долоо хоног буюу өнөөдрийн байдлаар аймгийн Нэгдсэн эмнэлэгт 241
иргэн хэвтэн эмчлүүлж байгаагаас 62 нь амьсгалын замын эмгэг, хүүхдийн тасагт 54
эмчлүүлэгч байгаагаас 50 буюу 92 хувь нь мөн тус өвчний хүндрэл болох уушгины
хатгалгаа өвчнөөр хэвтэн эмчлүүлж байгаа бөгөөд хүнд хоёр, хүндэвтэр зургаан
хүүхэд байна. Насны байдлаар авч үзвэл дийлэнх хувийг 5 хүртэлх насныхан эзэлж байна.
Томуу, томуу төст өвчний дэгдэлт их байгаатай холбоотойгоор амбулаторид хүүхдийн кабинетыг нэмж,
өдрийн эмчилгээг эхлүүлж, хүүхдийн мэргэжлийн хоёр эмч ажиллаж байна. Мөн хүүхдийн
эмч нар 24 цагаар утсаар зөвлөгөө өгч байна. Томуу, томуу төст өвчний шинж тэмдэг
илэрмэгц эрүүл мэндийн байгууллагад хандах, харин өвчнөөс урьдчилан сэргийлэхийн тулд эцэг эхчүүд хүүхдэдээ тавих хараа
хяналтаа сайжруулж, асаргаа сувилгааг гэрээр сайн хийж, гэрийн дэглэм сахих
ёстой гэдгийг Аймгийн Нэгдсэн эмнэлгийн Хүүхдийн тасгийн эрхлэгч А.Ууганцэцэг анхаарууллаа.
Амбулаторийн үзлэгийн 8,3 хувь, түргэн тусламжийн дуудлагын
24 хувийг амьсгалын замын эмгэгийн тохиолдол эзэлж байна.
