Улаанбаатар
ДАРХАН-УУЛ: 8.9 тэрбум төгрөгийн хөнгөлөлттэй зээл олгохоор боллоо
ОРОН НУТГИЙН МЭДЭЭ | ДАРХАН-УУЛ
Дархан, 2025 оны гуравдугаар сарын 31 /МОНЦАМЭ/. Жижиг дунд үйлдвэрийг хөгжүүлэх сангаас Дархан-Уул аймагт 10.5 тэрбум төгрөгийн хөнгөлөлттэй зээлийг олгохоор зарласан. Уг зээлийн сонгон шалгаруулалт өнгөрсөн долоо хоногт болж 57 төсөл ирснээс нэг ААНБ оролцох боломжгүй болж 56 иргэн, ААНБ-ын төслийн материалыг сонгон шалгаруулалтын дэд хорооны гишүүд хянаж, төслийн танилцуулгыг сонссон.
Аймгийн төсөл сонгон шалгаруулах дэд хорооноос дээрх 56 ААНБ-д 8,9 тэрбум төгрөгийн дэмжлэг үзүүлэх тогтоол гаргаж аймгийн засаг даргын захирамжаар баталгаажуулжээ. Улмаар хөнгөлөлттэй зээлд хамрагдахаар ирүүлсэн материалын хамт Засгийн газрын хэрэгжүүлэгч агентлаг ЖДҮ-ийн газарт хүргүүлсэн юм.
Төслийн шалгаруулалтад тэнцсэн иргэн, ААНБ-ын материалыг хянаж шаардлага хангасан гэж үзэн 56 ААН-д 8.9 тэрбум төгрөгийн хөнгөлөлттэй зээл олгохоор боллоо.
Үлдэгдэл 1.6 тэрбум төгрөгийг төслийн сонгон шалгаруулах дэд хорооны хуралдаанаар дахин шинээр төсөл хүлээн авч хэлэлцэж сонгон шалгаруулахаар болжээ.
Ташрамд, аймгийн засаг дарга, ХХААХҮЯ болон Сангийн сайдтай байгуулсан гэрээний хүрээнд энэ жил Дархан-Уул аймагт нийт 10.5 тэрбум төгрөгийн хөнгөлөлттэй зээлийг олгохоор хуваарилсан.
Энэ хүрээнд ЖДҮ эрхлэгч 56 ААНБ өөрийн үйлчилгээгээ сайжруулах, ажлын байр нэмэгдүүлэх, өргөжүүлэхэд зориулж хөнгөлөлттэй зээл авахаар боллоо.
