Улиастай, 2025 оны дөрөвдүгээр сарын 2 /МОНЦАМЭ/. Завхан аймгийн Хөгжим бүжгийн коллежийн морин хуурын чуулга Дынгылдай уралдааны гран при шагнал хүртжээ.

ОХУ-ын Тува улсын Кызыл хотноо олон улсын өсвөрийн үндэсний хөгжимчдийн "Дынгылдай" уралдаан 3-р сарын 29-ний өдөр болжээ. Энэ уралдаанд Тува, Буриад, Алтай, Хакасия, Монгол зэрэг улсын мэргэжлийн урлагийн сургуулийн 100 гаруй сурагч оролцож авьяас чадвараараа өрсөлдсөн байна.

Мэргэжлийн урлагийн уралдаанд Монгол Улсын консерваторын харьяа Хөгжим бүжгийн коллежоос 33 хүний бүрэлдэхүүнтэй баг амжилттай оролцоод ирсэн. Уралдааны ансамбль хөгжмийн төрөлд манай суралцагчдын морин хуурын чуулга амжилттай оролцож Гран при шагналыг хүртсэн байна. Мөн ёочин хөгжмийн чуулга тэргүүн байр, ятгын чуулга гуравдугаар байрын шагналыг хүртээд байна.

Уралдааны гоцлол хөгжмийн төрөлд ахлах насны ангилалд суралцагч Н.Тэмүүлэн морин хуур хөгжмийн бүтээлээр тэргүүн байр, Г.Ганхуяг морин хуур хөгжмийн бүтээлээр гуравдугаар байр, Ц.Оюумаа ёочин хөгжмийн бүтээлээр тусгай байрыг хүртсэн байна.

Уралдааны дунд насны ангилалд суралцагч А.Жаргал ятга хөгжмийн бүтээлээр тэргүүн байр, Э.Энх-Оргил морин хуур хөгжмийн бүтээлээр хоёрдугаар байр, С.Мөнх-Оргил эвэр бүрээ хөгжмийн бүтээлээр гуравдугаар байр, Г.Дагнидмаа ёочин хөгжмийн бүтээлээр тусгай байр, Д.Оргилболд эвэр бүрээ хөгжмийн бүтээлээр тусгай байрыг хүртлээ. Концертмейстер багш М.Ариунсайхан "Лучший концертмейстер'' шагналыг хүртэж амжилт дүүрэн ирлээ.

Аливаа улсын тусгаар тогтнол, халдашгүй дархан байдал нь үндэсний өв соёл, ардын хөгжим, эх оронч сэтгэлгээтэй нягт холбоотой байдаг.

Тиймээс манай чуулгын хөгжимчид үндэсний хөгжмийнхөө онцлогийг харуулсан бүтээлүүдээр оролцож, Н.Жанцанноровын "Нутаг минь- Хүлэг минь", Ж.Мэнд-Амарын "Хувилбар аяз"-ыг тоглосон байна. 

Морин хуурын чуулга маань жил бүр шинэ суралцагчдыг сургаж, дадлагажуулдаг туршлагатай хамтлаг. Урлагийн гавьяат зүтгэлтэн Б.Шаравын “Манан”, Ардын жүжигчин Н.Жанцанноровын “Мандухай цэцэн хатан”, “Цагаан суварга” урлагийн гавьяат зүтгэлтэн Д.Цэвээнравдангийн морин хуур хөгжимд зориулсан монгол ардын хоёр дууны найруулга, урлагийн гавьяат зүтгэлтэн Ц.Сүхбаатарын “Үүлэн бор” гэхчлэн морин хуур хөгжимд зориулсан бүтээлүүдээр дагнасан морин хуурын тоглолтыг Завхан аймагт анх удаа тайзнаа тавьж байсан хамтлаг юм гэж Монгол Улсын консерваторын харьяа Хөгжим бүжгийн коллежоос мэдээлэв. 

Монголчууд морин хуурыг бүтээж, түүний тоглох арга барилыг үндэсний уламжлалт урлагийн сонгодог төрөл болтол хөгжүүлж чадсан нь хүн төрөлхтний соёлын өв санд монгол угсаатны оруулсан хувь нэмэр мөн гэдгийг үнэлж 2003 онд ЮНЕСКО Монголын уламжлалт морин хуурын урлагийг “Хүн төрөлхтний аман болон утга соёлын шилдэг дээж”-ээр тунхагласан байдаг.

Хөгжим бүжгийн коллежийн суралцагч Г.Дагнидмаа ёочин хөгжмийн бүтээлээр тусгай байр,

Концертмейстер багш М.Ариунсайхан "Лучший концертмейстер'' шагналыг хүртжээ