Мандалговь, 2025 оны дөрөвдүгээр сарын 2 /МОНЦАМЭ/. “Эрүүл монгол хүн” үндэсний хөдөлгөөний хүрээнд Дундговь аймаг “Эрүүл Дундговь” дэд хөтөлбөрийг батлан хэрэгжүүлж байна.

Тус дэд хөтөлбөрт 1) Хүн амын дунд зонхилон тохиолдох өвчлөлийг эрт илрүүлэх, эмчлэн эрүүлжүүлэх, 2) Эмч, мэргэжилтнүүдийн мэдлэг, мэргэжлийн ур чадварыг дээшлүүлж, эмнэлгийн тусламж үйлчилгээнд шинэ технологийг нэвтрүүлэх, 3) Иргэдийн эрүүл мэндийн боловсролыг нэмэгдүүлж, өвчлөл, нас баралтын шалтгаан, эрсдэлт хүчин зүйлсийг бууруулах гэсэн гурван зорилтыг дэвшүүлж, 2025 онд 8 үйл ажиллагааг хэрэгжүүлэхээр төлөвлөжээ.

Аймгийн ЭМГ-ын мэдээлснээр аймгийн хүн амын дунд халдварт бус өвчлөл зонхилж байгаа бөгөөд хоол боловсруулах эрхтэн тогтолцоо, амьсгалын тогтолцоо, шээс бэлгийн замын өвчлөл, зүрх судасны тогтолцоо, бэртэл хордлого, гадны шалтгаант өвчлөл тэргүүлж байна.

Хоол боловсруулах тогтолцооны өвчлөлийн дотор амны хөндийн өвчлөл шүдний цоорол, шүд ба дайвар бүтцийн эмгэг 63,3 хувийг эзэлж байна. Нас баралтын шалтгааны дийлэнхийг зүрх судасны тогтолцооны өвчин, хорт хавдар, бэртэл, хордлого, амьсгалын тогтолцооны өвчин, хоол боловсруулах тогтолцооны өвчин эзэлдэг.

“Эрүүл Дундговь” дэд хөтөлбөрийн хүрээнд тус аймаг эмч, эмнэлгийн мэргэжилтнүүдийн мэдлэг ур чадварыг дээшлүүлж, шинэ технологийг нэвтрүүлж, зонхилон тохиолдох өвчлөлийг эрт илрүүлэн, эрүүлжүүлэх тогтолцоог бий болгох зорилго дэвшүүлсэн юм.

Аймгийн Засаг дарга С.Мөнхчулуун Олон улсын эмч нарын өдрийг тохиолдуулан зохион байгуулсан “Эмчээ сонсъё” хэлэлцүүлгийн үеэр хэлсэн үгэндээ энэ тухай тодотгож, “Аймгийн Засаг даргын 2024-2028 оны үйл ажиллагааны “Хөдөөгийн сэргэлт-Шинэ Дундговь” хөтөлбөрийн хүрээнд эмнэлгийн болон нийгмийн эрүүл мэндийн тусламж үйлчилгээний чанар хүртээмжийг сайжруулах, иргэдийн эрүүл мэндийн боловсролыг дээшлүүлэх, хүн амын дунд өвчлөлийг бууруулах зорилгоор 8 үйл ажиллагааг төлөвлөн хэрэгжүүлж эхлээд байна.

Энэ хүрээнд эмнэлгийн тоног төхөөрөмжийн хүрэлцээг сайжруулж, эмч, эмнэлгийн ажилтнуудаа чадавхжуулж, сумдын ЭМТ-ийн хүний нөөцийн хангалтыг нэмэгдүүлэх, энэ ондоо хавдрын эмчилгээ, оношилгоог аймагтаа нэвтрүүлэх, эрүүл мэндийн дотоодын аялал жуулчлалыг Дундговь аймагт авдаг эрүүл мэндийн салбараараа манлайлах аймаг болгох зорилтыг бид тавиад байна” хэмээн онцолсон.

Тус хөтөлбөрийн хүрээнд эрүүл мэндийн мэргэжлээр суралцаж байгаа, цаашид орон нутагтаа тогтвор суурьшилтай ажиллах эмч, эмнэлгийн ажилтнуудтай гэрээ байгуулан сар бүр 500,0 мянган төгрөгийн дэмжлэгийг олгохоор шийдвэрлэж, өнөөдрийн байдаар 9 хүнд нийт 45,0 сая төгрөгийн дэмжлэг үзүүлжээ.

Мөн анхан шатын эрүүл мэндийн байгууллагын хүний нөөцийн тогтвортой байдлыг хангах зорилгоор сум, өрхийн эмнэлэгт тогтвортой ажиллаж байгаа эмч эмнэлгийн ажилтанд 2 жил тутамд 3,0 сая төгрөгийн мөнгөн дэмжлэгийг 2, 4 дэх жилд нэг удаа олгохоор шийдвэрлэсний дагуу 16 эмчид нийт 48,0 сая төгрөгийн дэмжлэг үзүүлсэн байна. Эмч, эмнэлгийн мэргэжилтнүүдийг мэргэшүүлэх, тус салбарын хүний нөөцийн хангалтыг сайжруулах үйл ажиллагаанд 96 сая төгрөгийн дэмжлэг олгожээ.

Засаг дарга С.Мөнхчулуун мөн хэлсэн үгэндээ, “Орон нутгийн төсвийн хөрөнгө оруулалтаар 2025 онд эрүүл мэндийн салбарт хорт хавдрын химийн эмчилгээ, Нэгдсэн эмнэлгийн гадна тохижилт, аюултай хог хаягдал тээвэрлэх зориулалтын автомашин, эмнэлгийн барилгын зураг төсөв хийх, лабораторийн тоног төхөөрөмж нийлүүлэх ажил, Нэгдсэн эмнэлэг, 90 ортой эмнэлэг, амбулаторийн барилгын их засвар, Зооноз өвчин судлалын төвийн шинэ барилгын зураг төсөв, Сайнцагаан сумын зүүн өрхийн эмнэлгийн барилгын зураг төсвийн ажлыг гүйцэтгэхээр ажиллаж байгаагаа танилцууллаа.

Үүнээс шинэ эмнэлэгт хийх 1,4 тэрбум төгрөгийн үнэ бүхий вакуум мэс заслын өрөө байгуулах ажлын тендер зарлагдаад гүйцэтгэгчтэй гэрээ байгуулан үйл ажиллагаагаа эхлүүлсэн байна.  

2024 онд ЭМЯ-тай хамтран, аймгийн Нэгдсэн эмнэлэгт явуулын эмнэлэг, харалттай суурин рентген аппарат суурилуулж, яаралтай түргэн тусламжийн үйлчилгээг сайжруулах зорилгоор Баянжаргалан сумын эмнэлэгт ЭМЯ-наас түргэн тусламжийн машин өгсөн бол цаашид 5 суманд мөн тусламжийн машин олгохоор шийдвэрлэжээ.  

Засаг даргын нөөц хөрөнгөөс энэ жил Дэлхийн эмч нарын өдөрт зориулсан Эрдэм шинжилгээний онол практикийн хурал, “Эмчээ сонсъё” хэлэлцүүлэг, спортын үйл ажиллагаанд нийт 11 сая төгрөгийг зарцуулахаар шийдвэрлэсэн ба цаашид Олон улсын эмч нарын өдөрт зориулсан тэмцээн уралдаан, үйл ажиллагааг уламжлал болгон Засаг даргын ивээл дор зохион явуулж байхаар боллоо.