Улаанбаатар
Монгол, БНЧУ-ын дипломат харилцааны 75 жилийн түүхэнд чухал үүрэг гүйцэтгэсэн эрхмүүдийн ховор гэрэл зургийг дэлгэв
МОНГОЛЫН МЭДЭЭ | СОЁЛ УРЛАГ
Улаанбаатар, 2025 оны наймдугаар сарын 8 /МОНЦАМЭ/. Монгол Улс, Бүгд Найрамдах Чех Улс дипломат харилцаа тогтоосны 75 жилийн түүхэн ойн хүрээнд зориулсан “Дипломат харилцааны ур ухаан” үзэсгэлэнг Г.Занабазарын нэрэмжит Дүрслэх урлагийн музейд өнөөдөр нээлээ.
Уг үзэсгэлэнг “Шадар түшээ соёлын элч” сангийн санаачилгаар "Коруна" Монгол-Чех хэл, соёлын төв хамтран зохион байгуулж буй юм. Үзэсгэлэнд хоёр орны харилцааны түүх болон уг харилцааг хөгжүүлэхэд үнэтэй хувь нэмэр оруулсан үе үеийн төлөөлөл, Элчин сайд нар, ахмад дипломатууд, ЭСЯ-ны хамт олон болон эрхмүүдийн гавьяа зүтгэлийг ховор гэрэл зураг болон түүхэн баримтуудаар бүрдүүлэн харуулжээ.
“Шадар түшээ соёлын элч” сангийн тэргүүн П.Батцогт, "Монгол Улсын Шадар сайд, УИХ-ын гишүүн,
төр нийгмийн зүтгэлтэн, бидний аав Ч.Пүрэвдоржийн нэрэмжит “Шадар түшээ соёлын элч” сан аавынхаа эх
орондоо хийж бүтээж, санаачлан эхлүүлж байсан ажлын хүрээнд үйл ажиллагаагаа
явуулж байна. Энэхүү үзэсгэлэнг монголын төрийг төлөөлөн дэлхийд дуу хоолойгоо хүргэж, хоёр орны харилцаанд
үнэт хувь нэмэр оруулсан ахмад дипломатчид, Элчин сайд нар, ЭСЯ-ны хамт олон
болон тэдний алдар гавьяаг олон нийтэд таниулан сурталчлах, хүндэтгэн дурсах зорилгоор соёлын болон түүхэн баримтыг дэлгэж байна. Ташрамд дурдахад, миний хадам аав, С.Цоггэрэл Монгол Улсаас
БНЧУ-д Онц бөгөөд Бүрэн эрхт Элчин сайдаар 2009-2013 онд
ажиллаж, хоёр орны хамтын ажиллагааг шинэ эрин үед тэлэхэд үнэт хувь нэмрээ
оруулсан төрийн зүтгэлтэн билээ. Мөн хоёр
орны харилцаанд 75 жилийн туршид чухал үүрэг гүйцэтгэсэн эрхмүүдийн 75 түүхэн
гэрэл зураг, анхны эх баримтуудыг дэлгэснээрээ онцлогтой” гэв.
Хоёр улс 1950 онд дипломат харилцаа албан ёсоор тогтоосон. Монгол Улсын Ерөнхийлөгч У.Хүрэлсүх БНЧУ-д 2025 онд хийсэн төрийн айлчлалаар хоёр орны харилцааны түвшинг шат ахиулан Иж бүрэн түншлэлд хүргэсэн нь хоёр улсын харилцаа улам бэхжиж байгаагийн илрэл юм.
Тус үзэсгэлэн энэ сарын 10-ныг хүртэл үргэлжилнэ.
