Шалгалт мэхлэгчдэд шоронд хорих ял ногдуулжээ

Дэлхийд | Боловсрол
khulan@montsame.gov.mn
2018-08-08 10:04:37
БЭЭЖИН. /Эн-Эйч-Кэй/. Хятад улсад хоёр жилийн өмнө элсэлтийн ерөнхий шалгалтын үеэр хуулах ажиллагаа зохион байгуулсан 6 хүнд Бээжингийн шүүхээс хорих ял оноожээ.

Хятадын “CCTV” телевизээр хэрэгтнүүдийн тухай мэдээлсэн бөгөөд тэдний дунд зөвлөгч багш хүртэл байсан байна. Уг хэрэгтнүүдэд 20 сараас 4 жил хоригдох ял тус тус оноожээ. Мөн маш жижиг хэмжээтэй чихэвчнүүд болон баллуур шиг хэлбэр бүхий дэлгэцтэй төхөөрөмж зэргийг шалгалтад оролцсон 33 хүүхдээс хураан авчээ. Шалгалтын зөв хариултыг ойролцоох зочид буудлаас илгээж байсан байна.

Мөн хэрэгтнүүд нь шалгалт авсан багш бүрт 4500 доллар төлсөн байсан нь сүүлийн жилүүдэд Бээжинд гарсан ийм төрлийн хэргүүдээс хамгийн ноцтойд тооцогдож байгаа ажээ.

Хятадад шалгалтын үеэр хууран мэхлэх явдал нь нийгмийн томоохон асуудлуудын нэг болоод байгаа юм. Тус улсад жил бүр 10 сая орчим хүн их сургуульд элсэх шалгалт өгдөг аж. Мөн их сургуульд элсэх өрсөлдөөн ч ихээхэн ширүүссээр байгаа юм байна.
 
Э.Хулан
 
Холбоотой мэдээ