Улаанбаатар
ХААН банк хуурамч и-мэйл хаягнаас болгоомжлохыг анхааруулж байна
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/ ХААН банкны харилцагчдын мэдээллийг хуулбарлах, интернэт банкны нууц үгийг мэдэх, мөнгө угаах зорилгоор банкны нэрийн өмнөөс хуурамч и-мэйл иргэд болон байгууллагууд руу илгээж буй тохиолдлууд гарсаар байгааг бид өмнө сэрэмжлүүлсэн. Иймд хуурамч и-мэйлээс сэргийлэхийг Хаан банкнаас иргэдэд анхааруулж байна.
Тус банкнаас хуурамч и-мэйлд орсон холбоосыг хаалган шуурхай арга хэмжээ авсан ч энэ төрлийн хуурамч и-мэйл болон холбоос таны хувийн болон байгууллагын и-мэйл хаягт ирсэн тохиолдолд хувийн мэдээллээ алдахаас сэргийлж, сонор сэрэмжтэй байхыг зөвлөж байна.
Хаан банкнаас интернэт орчинд харилцагчдынхаа аюулгүй байдлыг хамгаалах, сэрэмжлүүлэх үүднээс дараах анхааруулгыг хүргэв. Үүнд:
- Аливаа банк харилцагчаас хувийн мэдээлэл, нууц үгээ шинэчлэх, мэдээллээ илгээх хүсэлтийг и-мэйл хаягаар хэзээ ч асуудаггүй болохыг анхаарна уу.
- Хуурамч и-мэйлд хариу илгээх, ирсэн холбоос дээр дарах, хавсралт файлыг нээх, өөрийн хувийн мэдээллээ оруулахгүй байхыг анхаарна уу
- Хуурамч и-мэйл илгээсэн этгээдийн нэр, хаяг сэжигтэй байгаа эсэхэд анхаарна уу.
- Хуурамч и-мэйл нь ямар ч хэл дээр бичигдсэн байж болох ба зөв бичгийн дүрмийн болон утгын алдаатай байдаг тул анхаарна уу.
- Хуурамч и-мэйлд агуулагдаж буй холбоосон дээр хулганаа аваачихад тухайн харилцагч байгууллагын албан ёсны хаяг биш сэжигтэй хаяг харагддагийг анхаарна уу
Ж.Батсайхан
