Ulaanbaatar
ДУНДГОВЬ: “Хөдөөгийн хөх хурандаа” өгүүллэгт эх орны тусгаар тогтнолын үнэ цэнийг өгүүлжээ
ОРОН НУТГИЙН МЭДЭЭ | ДУНДГОВЬ
Мандалговь, 2025 оны гуравдугаар сарын 20 /МОНЦАМЭ/. Дундговь ЗДТГ-ын Цэргийн штаб, С.Буяннэмэхийн нэрэмжит
аймгийн Төв номын сангаас цэрэг эх орны сэдэвт “Сургамжит өгүүллэг” зохиох
уралдаан зарлаж, уралдаанд 11 бүтээл иржээ.
Тус уралдаанд Сайнцагаан сумаас оролцогч, ахмад багш
Навааны Мөнхцэцэг “Хөдөөгийн хөх хурандаа” өгүүллэгээр тэргүүн байр, Хоролжавын Энхтөр “Нулимс”
өгүүллэгээр хоёрдугаар байр, Сэргэлэнгийн Уранбайгаль "Эцсийн захиа"
өгүүллэгээр удаах байрт шалгарчээ.
Уралдааны тэргүүн байрын шагналт Н.Мөнхцэцэг өгүүллэгээ
өөрийн амьдралаас сэдэвлэсэн ба “Хөдөөгийн хөх хурандаа” өгүүллэг нь түүний тав дахь
бүтээл. Тус өгүүллэгт цэрэг хүний хайр дурлал, амьдрал, ажил хөдөлмөр,
цэргийн анги, цэргүүдийн амьдралаар эх орон, тусгаар тогтнолын үнэ цэнийг
харуулснаараа онцлог юм.
Өгүүллэгийн нэгэн хэсгээс толилуулъя: ... “Манай тасаг
Монгол Улсын баатар Ц.Олзвойн нэрэмжит, оройн тооны өмнө нэрийг нь дуудна,
тасгийн дарга “БНМАУ-ын баатар Ц.Олзвой эх орныхоо тусгаар тогтнолын төлөө
баатарлагаар амь үрэгдсэн” хэмээн
хариулдаг байв.
Ротын байранд баатар Ц.Олзвойн алдрын булантай, невалууд байнга арчиж
тордож, амьд юм шиг л дээдлэн эрхэмлэж, цэвэр
үзэмжтэй байлгадаг байлаа” хэмээн ач зээ нартаа нүдэндээ баярын оч
бадруулан бахархалтайяа ярьж суудаг хань минь одоо хөдөө, хот хоёрын хооронд
хэдэн хүүхдийнхээ дунд явсан ”өвгөн буурал хурандаа” л болж дээ.
Зэвсэгт хүчин, онцгой байдлын албанд залуу насаа
зориулж “зэргээц, ноомхон” командаар жагсаж, бас жагсааж явсан буурал хурандаа
цөлх эр, журмын нөхдийнхөө нэрлэдгээр “Хөх хурандаа” хэмээн нэрлэгдэх болсон нь
түүний хэн явсныг хойч үеийнхэнд хэлээд өгөх шиг санагдана.
