Ulaanbaatar
АРХАНГАЙ: Айл өрхүүдийн нүхэн жорлонг ариутгаж, халдваргүйжүүлэх ажлыг эхлүүллээ
ОРОН НУТГИЙН МЭДЭЭ | АРХАНГАЙ
Архангай /МОНЦАМЭ/. БОАЖЯ, Орчны бохирдлыг бууруулах үндэсний хорооноос улсын төсвийн хөрөнгө оруулалтаар хийж буй гэр хорооллын айл өрхүүдийн нүхэн жорлонг ариутгах, халдваргүйжүүлэх ажлын хүрээнд "Био Эко" био бэлдмэлийг Эрдэнэбулган сумын өрхүүдэд тарааж эхэллээ. Аймгийн төв Эрдэнэбулган сум нь 7000 орчим өрхтэй, төвийн 6 баг, алслагдсан хөдөөгийн нэг багтай.
Энэхүү ажлыг "Био технологийн инкубатор" ХХК гүйцэтгэж байгаа ба Эрдэнэбулган сумын ЗДТГ, багийн Засаг дарга, нийгмийн ажилтнуудтай хамтран зохион байгуулж байна.
Ашигтай бичил биетний технологи "Био Эко" био бэлдмэлийг нүхэн жорлонд хэрэглэснээр:
-Лагийн шимэгдэлтийг нэмэгдүүлэх замаар лагийн хэмжээг багасгана,
-Халдварт микроб, өвчин үүсгэгч бактерийг дарангуйлж, устгах болон саармагжуулна,
-Нүхэн жорлон болон бохирын цооногоос гарах эвгүй үнэрийг арилгана,
-Хөрсний бүтцийг сайжруулж, эрүүлжүүлэн, нөхөн сэргээнэ,
-Химийн бус биологийн аргаар цэвэршүүлэлт хийнэ,
-Ой модны хортон шавжтай тэмцдэг байна.
