Улаанбаатар
Агаарын хөлөг мал амьтантай мөргөлдөх аюулаас сэргийлэх зөвлөл байгууллаа
ОРОН НУТГИЙН МЭДЭЭ | ХОВД
Ховд/МОНЦАМЭ/.Агаарын хөлөг шувуу, мал, амьтантай мөргөлдөх аюул дан ганц
нисэх буудлаар хязгаарлагдахгүй, нисэх буудлын орчимд, ялангуяа агаарын хөлгийн
хөөрөлт, буултын бүсэд тулгардаг байна. Тиймээс Зам тээврийн хөгжлийн сайдын
2016 оны 03 дугаар сарын 02-ны 48 дугаар тушаалаар батлагдсан “Агаарын
хөлөг шувуу, мал, амьтантай мөргөлдөх аюулаас сэргийлэх хөтөлбөр”-ийг
хэрэгжүүлэхтэй холбогдуулан Ховд аймаг дахь “Агаарын хөлөг шувуу, мал,
амьтантай мөргөлдөх аюулаас сэргийлэх зөвлөл”-ийг 10 гишүүний бүрэлдэхүүнтэй
байгуулав.
Тус зөвлөлийн
анхдугаар хуралдаан 10 дугаар сарын 23-нд Нутгийн удирдлагын ордны
хурлын өрөөнд болж аймгийн Засаг даргын орлогч Т.Жаргалсайхан болон
зөвлөлийн гишүүд оролцов. Хурлаар Ховд аймаг дахь “Агаарын хөлөг шувуу,
мал, амьтантай мөргөлдөх аюулаас сэргийлэх зөвлөл”-ийн 2019 онд хийж
хэрэгжүүлэх ажлын төлөвлөгөө болон хөтөлбөр хэрэгжүүлэх ирэх оны үйл
ажиллагааны төлөвлөгөөний талаар хэлэлцэж, баталсан байна.
Энэхүү зөвлөл нь Иргэний нисэхийн ерөнхий газрын харьяа “Ховд нисэх онгоцны буудал”-д хамгаалалтын бүс тогтоосны дагуу Буянт голын орчимд байгаа айл өрхүүдийн хог хаягдлыг эмх цэгцтэй болгож, хогийн саванд хийлгэх, нисэх буудлын орчинд болон үерийн сувагшилд сэг зэм, хог хаягдлыг хаяуулахгүй байх, тогтмол цэвэрлэх ажлыг холбогдох байгууллагуудтай хамтран гүйцэтгэнэ.
Мөн аэродромын орчмын бутлаг ургамлын ургалтад хяналт тавьж, хусаж цэвэрлэх, нүүдлийн шувуу ирэх үед Буянт голын ай сав газрыг шалгах, аэродромын бус орчимд жил бур мэрэгч устгалын ажил хийлгэх, шувуу үргээх тоног төхөөрөмжүүдийн бэлэн байдлыг хангаж ажиллах зэрэг ажлуудыг төлөвлөж, үе шаттайгаар зохион байгуулахаар болсон юм.
