Улаанбаатар
"Босоо хөх монгол" бүлгэмийн жагсагчдаас тайлбар мэдүүлэг авчээ
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/. Өнөө өглөө 08:00 цагт Их Тэнгэрийн зам дээр “Босоо Хөх Монгол” бүлгэмээс тайван жагсаал хийсэн байна. Гэвч зөвшөөрөлгүй жагсаал цуглаан хийсэн гэсэн үндэслэлээр тэднийг цагдаагийн хүчээр тарааж, Хан-Уул дүүргийн цагдаагийн хэлтэс рүү тус бүлгэмийн 30 гаруй гишүүнийг баривчлан авч явж, тайлбар мэдүүлэг авсны дараа сулласан байна.
“Босоо хөх Монгол” бүлгэмийн дээрх жагсагчид нийгэмд тулгамдаж буй хэд хэдэн асуудлыг дарга нарт дуулгахыг хүсч “Дураараа бензиний үнэ өсгөдөг авлигач, нефть импортлогч хэдхэн монополь компаниудын атганд багтах ёсгүй. Монгол Улс Хятадад сая тонн нефть үнэгүй бэлэглэхээ зогсоож, эх орондоо бензин шатахуунаа үйлдвэрлэе. Тамсагбулагийн нефть гаргаж экспортлож байгаа гэрээг эргэн харах цаг болсон. Жирийн ард иргэд бас машин унамаар байна. Дараагийн удаа Улаанбаатар хот, бүх аймаг орон нутагт зам хааж тэмцэнэ. Нэгдэхийг уриалж байна” зэрэг шаардлага тавьжээ.
