Дэлгэрэх голын голдрилыг шулуутгах ажил ирэх онд дуусна

ОРОН НУТГИЙН МЭДЭЭ | ӨВӨРХАНГАЙ
batchimeg@montsame.mn
2018-12-11 10:17:59

Өвөрхангай /МОНЦАМЭ/. 2014 оноос хойш үргэлжилж байгаа Арвайхээр сумын төв дундуур урсдаг Дэлгэрэх голын голдирлыг шулуутган засах ажил ирэх онд дуусна. 

Бороо хур ихтэй зун эргээсээ багагүй халиж, 3, 7 дугаар багийн зарим айл өрх усанд автах бэрхшээлтэй тулгардаг байсан ч ихэнхдээ урсах усгүй өнждөг голын голдрилыг засах нь аймгийн төвийн “нүүр царай”-ны асуудал гэж удирдлагууд үзсэн юм. Гол тахиралдан урсахдаа газрын хөрсийг багагүй эвдэж байгаа тул голдрилыг шулуутгавал их хэмжээний талбайг эвдрэлээс хамгаална хэмээн байгаль орчны мэргэжилтнүүд зөвлөжээ.

2015 онд 11.6 метрийн өндөртэй 53732,0 м3 ус хуримтлуулах хөвийг бүтээн байгуулснаар эхэлсэн уг ажилд жил бүр багагүй төсөв зарцуулсаар юм. 2017 онд улс, орон нутгийн 58 сая төгрөгийн санхүүжилтээр 340 метр газарт голдрил шулуутгах ажлыг гүйцэтгэсэн бол энэ жил орон нутгийн төсвийн 500 сая төгрөгийн хөрөнгөөр хуучин төмөр бетонон гүүрийн хоёр талд явган хүний замын өргөтгөл хийх, 2 дугаар багийн авто зам дээр ус давуулах далан байгуулах зэрэг ажлуудыг “Өндөр сант хайрхан” ХХК гүйцэтгэжээ.

Мөн улсын төсвийн 1 тэрбум төгрөгөөр мөсөн тошингоос хамгаалах 180 метр урт далан байгуулах, 600 метр газарт голын голдрилыг шулуутгах, үерийн суваг хийх, “Дэлгэрэх” цэцэрлэгт хүрээлэнгийн тохижилтын ажил зэрэг ажлуудыг 60 хувийн гүйцэтгэлтэй хийж байна. 

 

Холбоотой мэдээ