Сайжруулсан түлш үнэ хямд, хүртээмжтэй байх хэрэгтэй

МОНГОЛЫН МЭДЭЭ | НИЙГЭМ
boloroo8136@gmail.com
2019-05-10 21:16:37

Улаанбаатар /МОНЦАМЭ/. Засгийн газрын тогтоолоор энэ сарын 15-наас  нийслэлд түүхий нүүрс оруулахыг хориглосон. Тус тогтоолын хэрэгжилтэд 58 хүний бүрэлдэхүүнтэй байгуулсан ЦЕГ-ын тусгай нэгж хяналт тавих юм.


Орчны бохирдлыг бууруулах үндэсний хорооны 2019 онд хэрэгжүүлэх ажлын хүрээнд “Агаар, орчны бохирдлын эсрэг хүчээ нэгтгэе” чуулганыг Улаанбаатар паласт өнөөдөр зохион байгууллаа.


Чуулганд Байгаль орчин, аялал жуулчлалын сайд, үндэсний хорооны дарга Н.Цэрэнбат, нийслэлийн Засаг дарга бөгөөд Улаанбаатар хотын захирагч С.Амарсайхан, нийслэлийн Статистикийн газрын дарга Ц.Заяхүү тэргүүтэй албаны хүмүүс болон зургаан дүүрэгт ажиллах орон тооны бус 4604 ажилтан, иргэдийн төлөөлөл оролцов.


БОАЖ-ын сайд Н.Цэрэнбат хэлэхдээ, “Улаанбаатар хотын 220 мянга гаруй гэр хорооллын айл өрхөд сайжруулсан түлш хэрэглүүлэх, түүхий нүүрс хэрэглэхгүй байхад хяналт тавьж ажиллах гэрээт ажилтнууд өнөөдөр чуулганаа хийж байна. Энэ жил иргэд өөрсдөө гэр, байшингийн дулааны алдагдлыг бууруулах хэрэгтэй. Хэрвээ ингэж чадвал түлшний хэрэглээгээ 30 хувиар бууруулах боломжтой тооцоо гарсан. Төрөөс түүхий нүүрсний хэрэглээг хориглосонтой холбоотой төрийн өмчит “Тавантолгой түлш” компанийг байгуулсан юм. Одоогоор 60 гаруй мянган тонн сайжруулсан түлш үйлдвэрлээд байна. Энэ оны эцэс гэхэд 600 мянган тонн сайжруулсан түлш үйлдвэрлэхээр төлөвлөгөсөн. ЦЕГ 58 орон тоо шинээр бий болгон дөрвөн тусгайлсан постоор тогтоолын хэрэгжилтийг хянана” гэв.


Орчны бохирдлыг бууруулах үндэсний хорооны нарийн бичгийн дарга бөгөөд ажлын албаны дарга Ч.Гантулга, “Засгийн газрын тогтоолыг хэрэгжүүлэх ажлыг үе шаттай зохион байгуулах ёстой. Улаанбаатар түлш компани 600 мянган тонн нөөцийг бий болгохын төлөө ажиллаж байна. Мөн түгээх, тээвэрлэх, сайжруулсан түлшний карт гаргах гэх мэт олон ажил хийнэ. Өнгөрсөн хугацаанд түүхий нүүрс борлуулж байсан 540 орчим иргэн, аж ахуйн нэгжийг оператор компани авч ажиллуулах болсон. 600 мянган тонн сайжруулсан түлшийг Улаанбаатар хотын айл өрх ирэх өвөл түлж хүрнэ гэсэн тооцоо бий” гэв.


Нийслэлийн Засаг дарга бөгөөд Улаанбаатар хотын захирагч С.Амарсайхан, “Агаарын бохирдлыг бууруулах гэдэг хүнд хэцүү бөгөөд нарийн төлөвлөгөө, тооцоолол,  нэгдсэн бодлого, хүн хүч, хөрөнгө мөнгө шаардсан ажлыг ганц төрийн байгууллага шийдвэрлэнэ гэж зорих нь учир дутагдалтай гэдгийг өнгөрсөн хэдэн жилийн түүхэн сургамж бидэнд хангалттай нотолж харууллаа. Саяхан бид холбогдох албаны хүмүүсийн хамтаар “Тавантолгой түлш” компанийн сайжруулсан түлшний үйлдвэртэй танилцаж, Засгийн газрын тогтоолыг хэрэгжүүлэхэд тулгарч болзошгүй эрсдэл, нөхцөл байдлыг үнэлж дүгнэн, тодорхой шийдвэр гаргасан. Агаар, орчны бохирдлыг бууруулахад иргэн бүрийн оролцоо маш чухал гэдгийг дахин хэлье” хэмээсэн юм.  


Иргэд сайжруулсан түлшийг 540 орчим цэгээс картаар, зохих хязгаартай авах юм. Одоогийн байдлаар, 2-6 тонн түлш авах эрхтэй байхаар төлөвлөжээ. Сайжруулсан түлшийг ирэх сарын 15-наас худалдаанд гаргах бөгөөд 25, 600, 900 кг болон нэг тонн гэсэн савалгаатай, нэг тонн нь 150 мянган төгрөг байх юм байна.


Түүхий нүүрс нийслэлд оруулахгүйн тулд, Морингийн даваа, Тахилт, Гачуурт, Налайхад нэмэлт явуулын пост гаргах аж. Харин нийслэлийн гэр хорооллын 220 орчим мянган айлыг сайжруулсан түлш хэрэглэх мэдээллээр хангах ажлыг төвийн зургаан дүүргийн хорооны Засаг дарга, хэсгийн ахлагч нар хийх юм. 


Хан-Уул дүүргийн агаарын бохирдол хариуцсан мэргэжилтэн Ш.Дулам ярихдаа, “Түүхий нүүрсийг хэрэглүүлэхгүй талаар иргэдэд ухуулга сурталчилгаа хийнэ. Айл өрхийн хэрэглэж буй зуух нам даралтын, ханан  пийшинтэй, энгийн, төслийн гэхчлэн янз бүр учир түлшний асах шатах байдал өөр өөр байдаг. Тиймээс 2019-2020 онд нийслэлийнхнээ дулаан, тухтай өвөлжүүлэхийн тулд бид туршилт хийж байна. Өнгөрсөн амралтын өдөр сайжруулсан түлшийг 3 айлд туршсан. Ингэхэд асалт, дулаан барилт, яндангаас гарч буй утааны хувьд эерэг нөлөөтэй гарсан. Хамгийн гол нь сайжруулсан түлш үнэ хямд, хүртээмж өргөн байхад анхаарах хэрэгтэй гэдгийг иргэд хэлж байна” гэв.

Халаалт шаардлагатай улиралд нэг өрх 4-5 тонн түүхий нүүрс хэрэглэдэг бол сайн шатдаг сайжруулсан түлш 3 тонныг хэрэглэх боломжтой гэсэн тооцоо гарчээ.



 

Холбоотой мэдээ