"Үндэсний бичиг" уралдааныг албан хаагчдынхаа дунд явуулжээ

Орон нутагт | Төв
tuv@montsame.gov.mn
2019-05-27 12:47:56

Төв  /МОНЦАМЭ/. Засгийн газрын 2012-2016 оны үйл ажиллагааны хөтөлбөрийг хэрэгжүүлэх зорилгоор төрийн албан хэрэг хөтлөлтийн стандартыг бүх шатанд мөрдлөг болгож, тэдний мэдлэг чадварыг дээшлүүлэх арга хэмжээ авахыг засгийн газрын гишүүд, агентлагийн дарга, бүх шатны засаг  дарга нарт үүрэг болгосон байна.

Энэ хүрээнд сум, аймаг, нийслэлийн хэмжээнд Үндэсний хэл бичгээ дээдлэх, уламжлах, сургах зорилгоор шат дараатай арга хэмжээ зохион байгуулдаг. Өнгөрсөн 4 дүгээр сарын сүүлээр улсын хэмжээнд үндэсний хэл бичгийн уралдааныг багш, сурагчдын дунд явуулсан нь үүний нэг илрэл юм.

Баян сумын Хэлний бодлогын салбар зөвлөлөөс жил бүр уламжлал болгон "Үндэсний бичиг" уралдааныг зохион байгуулдаг. Энэ жилийн уралдааныг “Хурдан тод уншигч, “Цэвэр сайхан бичигтэн” гэсэн төрлөөр явуулсан байна.

Уралдааны зорилго үндэсний бичиг соёлоо уламжлан дэлгэрүүлэх, тээх, түгээх үйлсэд хувь нэмэр оруулахад чиглэж байгаа ажээ.

“Хурдан тод уншигч”-аар ЗДТГ-ын нийгмийн халамжийн мэргэжилтэн Ц. Баярмаа 127 үг уншиж тэргүүн байрт, Эрүүл мэндийн төвийн эрхлэгч Н. Гантөмөр 117 үг уншиж дэд байрт, ЭМТ-ийн эх баригч эмэгтэйчүүдийн эмч Б. Долгормаа 116 үг уншиж гутгаар байрт оржээ.

“Цэвэр сайхан бичигтэн”-ээр Төрийн банкны теллер Г.Нандинцэцэг нэгдүгээр байр, ЗДТГ-ын олон нийтийн интернэт мэдээллийн ажилтан А.Золбоо хоёрдугаар байр, ЭМТ-ийн лаборант Н.Хоролжав гуравдугаар байрыг эзэлж хамт олноо тэргүүлсэн байна.

Холбоотой мэдээ