Багануурын уурхай төвийн бүсийн эрчим хүчний 70 хувийг нүүрсээр хангаж байна

МОНГОЛЫН МЭДЭЭ | УУЛ УУРХАЙ
munkhbaatar@montsame.gov.mn
2019-06-07 12:43:22
@s_munkhbaatar

Улаанбаатар /МОНЦАМЭ/. Монгол Улсын Ерөнхий сайд У.Хүрэлсүх нийслэлийн Багануур дүүрэгт ажиллаж байна. Тэрбээр эхлээд “Багануур” ХК-ийн удирдлага, ажилчидтай уулзлаа. Тус компанийн захирал Э.Номинчулуун компанийн уурхайн талаар мэдээлэв.



Тэрбээр "Багануурын уурхай 1978 онд байгуулагдсан, 1121 ажилтантай. Төвийн бүсийн эрчим хүчний 70 хувийг нүүрсээр хангадаг. Сүүлийн 3 жил ашигтай ажиллаж байна. Тоног төхөөрөмжийн 57 хувь нь ашиглах хугацаа хэтэрсэн. Нийт олборлолтынхоо 85 хувийг цахилгаан станцуудад нийлүүлдэг. Газраа буюу ордынхоо лицензийг алдсан асуудлаар шүүхэд хандаж, төр ордоо эргүүлж авсан. Одоо лицензээ “Багануур” ХК-ийнхаа нэр дээр шилжүүлж авах хүсэлтэй байна" гэдгээ Ерөнхий сайдад уламжиллаа.


Монгол Улсын Ерөнхий сайд У.Хүрэлсүх, "Багануурын уурхай бол улсын гал голомт болсон газар. Өвлийн бэлтгэлээ энэ сараас хангаж ажиллах ёстой. Лицензийн асуудлыг хэрхэхийг салбарын сайд шийдэж өгөөрэй" хэмээв. Мөн санхүүгийн сахилга бат дээр анхаарч ажиллах ёстойг анхаарууллаа. Хуурамч бичиг баримт бүрдүүлж, хууль бусаар ажилд орсон асуудал яригдаж байна. Сахилга бат, дэг журам тогтоож, үрэлгэн зардлаа танаж, ашигт ажиллагаагаа дээшлүүлэхийг үүрэг болголоо.



Багануурын уурхай өнгөрсөн 40 жилд 116 сая тонн нүүрс олборложээ. Энэ онд 4,1 сая тонн нүүрс олборлож борлуулах төлөвлөгөөтэй. 2018 онд улсад татвараар 24 тэрбум төгрөг төвлөрүүлсэн.

Холбоотой мэдээ