Монголын аврагчдыг олон улсын түвшинд үүрэг гүйцэтгэх чадвартайг онцлов

МОНГОЛЫН МЭДЭЭ | ХУУЛЬ
boloroo8136@gmail.com
2019-09-21 15:52:36

Улаанбаатар /МОНЦАМЭ/. “Говийн чоно-2019” олон улсын сургалт, дадлага сургуулийг Дорноговь аймагт энэ сарын 9-21-нд зохион байгуулж, дүгнэлт хэлэлцүүлгийг хийлээ.

ОБЕГ, АНУ-аас Монгол Улсад суугаа ЭСЯ, Энэтхэг, Номхон далайн цэргийн командлалтай хамтран зохион байгуулж буй энэхүү дадлага сургууль энэ жил Өмнөд, Зүүн бүсийн аймгуудыг хамруулан “Орон нутгийн чадавх ба бүс нутгийн харилцан ажиллагаа” сэдвийн хүрээнд танхимын, академик, дууриалган үзүүлэх дадлага сургууль болоод  команд штабын сургууль гэсэн 4 чиглэлийн 21 төрөлтэй болж байна.

Дадлага сургуулийн хүрээнд гамшиг ослын хор уршгийг арилгах үйл ажиллагааны үед  холбогдох төрийн болон төрийн бус байгууллагууд, гамшгаас хамгаалах улсын албад, олон улсын байгууллагуудын хоорондын уялдаа холбоог хангах зорилготой “Ослын үеийн удирдлагын систем”, гамшгаас хамгаалах менежментийн чиглэлээр харилцан туршлага солилцох академикийн сургалтыг анх удаа зохион байгуулснаараа онцлогтой.

Сургуулийн хүрээнд ОБЕГ-ын Үндэсний аврах бригад, Эрэлч нохойн алба, НОБГ-ын Нийслэлийн аврах анги-105, Дорноговь, Өмнөговь, Говьсүмбэр, Хэнтий, Сүхбаатар, Дорнод аймгийн Онцгой байдлын газрын аврагчид, АНУ-ын Аляскийн үндэсний гвардын аврагчидтай хамтран газар хөдлөлтийн гамшгийн үед нурсан барилгаас нэрвэгдэгсдийг аврах, үйлдвэрийн барилгад гарсан химийн осол болон галт тэрэгний ослын үед аврах ажиллагааны дууриалган үзүүлэх дадлага сургуулийг хийлээ.

Мөн Сайншанд сумын иргэдийг нүүлгэн шилжүүлэх дадлага сургуульд 99.5 хувь буюу 12 мянга гаруй хүн хамрагдсан бол хээрийн эмнэлэг дэлгэх дадлагыг явуулж, хүч хэрэгслийн бэлтгэл, бэлэн байдлыг хангуулсан байна.

Түүнчлэн гамшгаас хамгаалах бэлэн байдлын төлөвлөгөөг турших, цэрэг иргэний харилцан ажиллагааг жигдрүүлэх, олон улсын хүмүүнлэгийн тусламж хүлээн авах зохицуулалтыг сайжруулах, гамшгаас хамгаалах үйл ажиллагаанд иргэний байгууллагуудын оролцоог хангах зорилгоор команд штабын сургуулийг зохион байгууллаа. Тус сургуульд Гамшгаас хамгаалах улсын алба, яам, агентлаг, Төрийн цэргийн байгууллагууд, Үндэсний аюулгүй байдлыг хангах тусгайлсан чиг үүрэг бүхий байгууллагууд, олон улсын хүмүүнлэгийн байгууллагууд, гадаад улс орны төлөөлөл, бүс, орон нутгийн байгууллага, төрийн бус байгууллагынхан оролцсон юм.

Дүгнэлт хэлэлцүүлгээр энэ удаагийн олон улсын сургалтаар бүсийн аймгуудын харилцан ажиллагаа ажлын уялдаа холбоо сайжирч, гамшгийн үед мэдээ мэдээллийг богино хугацаанд солилцох боломж бүрдэхээс гадна гамшгийн үед орон нутгийн болон бүсийн түвшинд бие даан ажиллах чадвар дээшиллээ. Түүнчлэн  Монголын аврагчдын чадвар олон улсын түвшинд хүрч, хаана ч үүрэг гүйцэтгэх боломжтой байгааг сургалтыг хамтран зохион байгуулагч Ази, Номхон далайн цэргийн командлалын мэргэжилтнүүд онцлов гэж ОБЕГ мэдээллээ. 

 


 

Холбоотой мэдээ