Улаанбаатар
Монгол Улс бүс нутгийн эрчим хүчний интеграцид бодитой оролцох боломж бүрдлээ
МОНГОЛЫН МЭДЭЭ | УЛС ТӨР
Сочи. /МОНЦАМЭ/. Монгол Улсын Ерөнхий сайд У.Хүрэлсүх өчигдөр орон нутгийн цагаар 16.00 цагт Сочид хүрэлцэн очлоо. Тэрээр Оросын Ерөнхийлөгч В.В.Путинд бараалхаж уулзалт 50 минут үргэлжилсэн байна. Уулзалтаар Монгол Улсын нутгаар дамжуулан хийн хоолой тавих ажлыг эхлүүлэхээр тохиролцсон байна.
Уулзалтын үеэр Ерөнхий сайд У.Хүрэлсүх: “Гурван улсын Эдийн засгийн коридорын хүрээнд хэрэгжүүлэх хийн хоолойн төсөл нь гурван улсын нийгэм, эдийн засгийн хөгжилд чухал хувь нэмэр оруулна” хэмээн онцлон дурдсан бол ОХУ-ын Ерөнхийлөгч В.В.Путин “Уг төслийг хэрэгжүүлэхэд улс төрийн зүгээс ямар ч саад одоо байхгүй” хэмээсэн байна.
Ерөнхий сайдын гадаад бодлогын зөвлөх Б.Мөнхжингийн мэдээлснээр, энэ уулзалтаар олон жилийн турш яригдсан Монгол Улсын нутаг дэвсгэрээр байгалийн хий дамжуулах хоолой байгуулах асуудлаар хоёр тал Санамж бичиг байгуулжээ. Хоёр талын судалгааны ажлын багууд эдийн засгийн үр өгөөжийг тогтоох, техник эдийн засгийн үзүүлэлтийг боловсруулах ажлуудыг эхлүүлэх юм байна. Энэ төсөл амжилттай хэрэгжсэнээр Монгол Улс бүс нутгийн эрчим хүчний интеграцид бодитойгоор оролцох боломж бүрдэх юм.
Монгол Улсын
Ерөнхий сайд Ухнаагийн Хүрэлсүх 2019 оны 12 дугаар сарын 3-6-ны өдөр ОХУ-д албан ёсны айлчлал хийж
байгаа бөгөөд энэ нь Монгол Улсын Ерөнхий сайдын хувьд 9 жилийн дараах албан ёсны
айлчлал юм.
Ю.Дэлгэрмаа
