Тэшиг сумаас ирүүлсэн багц мэдээ

Булган аймгийн Тэшиг сумын Суурь боловсролын сургуулийн хамт олон 2015-2016 оны хичээлийн жилд" Хүүхэд нэг бүрийн хөгжлийн дэмжинэ" гэсэн зорилт тавин ажиллаж байна.  

Өөрийгөө илэрхийлэх чадвартай, зөв сайхан бичдэг хүүхэд, зөв дадал хэвшилтэй хүүхэд хүмүүжүүлэх, ахиц амжилтын эздийг төрүүлэх, дасгал хөдөлгөөнийг эрхэмлэдэг эрүүл бие бялдартай хамт олон болох зорилт дэвшүүлэн амжилттай хэрэгжүүлж "Хүүхэд бүхэн авьяастай-2016" тайлант өдөрлөгөө хийлээ.

Мөн өдөрлөгийн үеэр сумын Засаг дарга Ж.Гансүх, ИТХ-ын дарга Р.Очирсүрэн, ИТХ-ын нарийн бичгийн дарга Д.Туул нар хүрэлцэн очиж бяцхан сурагчид болон ахлах ангийн сурагч, сургуулийн багш ажилчдад ажлын өндөр амжилтыг хүсэн ерөөлөө.

ОХУ–ын мөсөн замын гүйлтийн цанын тэмцээнд түрүүллээ

ОХУ-д зохион байгуулагдсан "Мөсөн замын гүйлтийн цанын тэмцээн"-д Булган аймгийн Тэшиг сумын Дашийн Дамбын нэрэмжит суурь боловсролын сургуулийн 3б ангийн сурагч Алтанхуяг овогтой Ариунбилэг бага насны ангилалд түрүүлж алтан медалийн эзэн боллоо.

Мөн өнгөрөгч өвөл Тэшиг суманд зохиогдсон “Цанахүү – 2016” УАШТ- ий насны ангилалдаа мөнгөн медаль хүртжээ. Тэрээр бага наснаасаа буюу 5 настайгаасаа цанын спортоор хичээллэж эхэлсэн бөгөөд тус сумын ЕБС – ийн биеийн тамирын багш Ю.Соёлмаагийн удирдлаган дор бэлтгэл сургуулилтаа хийдэг байна.

Жишиг хотхон барьж байна

Булган аймгийн Тэшиг сумын Хилийн цэргийн 0286 дугаар ангийн хамт олон “Жишиг хотхон” байгуулахаар ажиллаж байна.

Энэ ажлыг хилийн цэргийн ангийн эмэгтэйчүүдийн зөвлөлөөс санаачилсан бөгөөд 5х5 хэмжээтэй 20 ширхэг зуслангийн байшин баригдаж  байна. Одоогийн байдлаар 8 байшин баригдаад байна. Төсөвт өртөг нь тус цэргийн ангиас гарч байгаа бол, ажиллуулж байгаа 10 хүний цалин Хөдөлмөрийн хэлтсийн нийтийг хамарсан ажлын төсвөөс гарч байна. Зуслангийн байшинтай болохын зэрэгцээ орон нутгийнхаа 10 иргэнийг ажлын байраар хангаж байна.  

Нээлттэй хаалганы өдөрт 4 багийн 100 гаруй иргэн оролцлоо

Булган аймгийн Тэшиг суманд  “Нээлттэй хаалганы өдөр” – ийг зохион байгууллаа.

Тус сумын нутгийн удирдлагууд орон нутгийн төрийн захиргааны бүх байгууллагууд иргэдийн санал зөвлөгөөг сонсож, төрийн бодлого боловсруулах шийдвэр гаргаж, үйл ажиллагааг дэмжиж туслахаар дэвшүүлсэн зорилтынхоо хүрээнд  уг өдөрлөгийг хийжээ. Гэхдээ сумын төв дээрээ нэг өдөр бужигнаад өнгөрсөнгүй сумын ЗДТГ-ын мэргэжилтнүүд хөдөөгийн багуудаар явж  мэдээлэл хийлээ. Энэхүү ажлыг хөдөөгийн 4 багт зохион байгуулж, 100 гаруй иргэд оролцсон бөгөөд хэрэгтэй мэдээлэл түгээсэн сайхан ажил боллоо хэмээн малчид ард иргэд санал сэтгэгдлээ илэрхийлж байлаа.  

Суманд хүүхдийн зуслантай болно

Булган сумын Тэшиг сумын “Тэшиг Ус” орон нутгийн өмчит аж ахуй тооцоот үйлдвэрийн газраас санаачлан “Хүүхдийн зуслан” байгуулах гэж байна.

Тус газрын захирал өөрийн унаж явсан машинаа зарж энэхүү ажлыг эхлүүлжээ. Энэ зусланд нийт 20 шовгор барихаар төлөвлөж байгаа бөгөөд одоогийн байдлаар 9-ийг өрж дуусгажээ. Нэг удаагийн ээлжиндээ 20-30 хүүхэд хүлээн авах хүчин чадалтай байхаар төлөвлөж байгаа тухай тус үйлдвэрийн газрын удирдлагууд үйл ажиллагаатай нь танилцах үеэр сумын удирдлагуудад ярьлаа.

Харин одоогоор санхүүгийн хүндрэл гараад зогсонги байдалтай байна. 

П.Батням