Улаанбаатар
Адуун сүрэгт хулангийн унага нийлжээ
ОРОН НУТГИЙН МЭДЭЭ | ДОРНОГОВЬ
Дорноговь/МОНЦАМЭ/.Дорноговь аймгийн Сайхандулаан сумын Цохио багийн малчин Г.Гүнсэндоржийн адуун сүрэгт хулангийн унага нийлжээ.
Энэ тухай малчин Г.Гүнсэндоржийг Сайхандулаан сумаас урагш Улаанбадрах сумын нутаг руу оторт явж байхад нь тааралдаж тодруулсан юм. Тэрээр ярихдаа “Нэг өдөр адуундаа явж байтал хулангийн унага сүргээсээ тасарч хоцорсныг олж харлаа.
Адуугаа эргүүлэн туух явцад өнөөх хулангийн унага адуу захлан явсаар манай хотонд ирсэн. Хэсэг хугацаанд тэжээсний дараа адуутай хамт бэлчээрт явдаг боллоо. Энэ хулан бараг арваад настай болж байгаа” гэж хуучилсан юм. Хулан бол дэлхийд төдийгүй Монгол орны нэн ховор төдийгүй хуулиар хориглосон амьтан юм.
Хуланг Монголын говийн эко системийг бүрэн илэрхийлэгч амьтан гэж мэргэжлийн судлаачид үздэг. Том толгойтой, урт чихтэй, шингэн сүүлтэй хул голдуу зүстэй хуланг монгол адуутай харьцуулахад биеийн галбир муутай харагдах. Бас царай муутай.
Хулан бол Алтайн өвөр говь, Өмнөговь, Дорноговийн баруун хэсэг, Дундговийн урд хэсэгт идээшилнэ. Монгол хулангийн тархалт 1990-ээд онд эрс хумигдсан бөгөөд 1994-1997 оны судалгаагаар Монголын өмнөд нутгаар нийт 33000-63000 толгой хулан тархсаныг тооцоолсон байна. 2003 онд шинэ судалгаагаар Монголын өмнөд нутгаар 177563 ам/км нутагт 20000 толгой хулан байгааг тооцоолсон аж.
Гэрэл зургийг Ч.Энхбаатар
