Улаанбаатар
О.Цогтгэрэл: Ардчилсан нам гишүүдийнхээ оролцоог хангадаг болох шаардлагатай
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. АН-ын даргын сунгаанд санал өгсөн нийт гишүүний 53.5 хувийн саналаар тус намын шинэ даргаар О.Цогтгэрэл сонгогдсон талаар УИХ-ын гишүүн Ц.Туваан өнөөдөр УИХ дахь АН-ын бүлгийн ээлжит хэвлэлийн хурлын үеэр мэдээлэв.
Тус намын даргын сунгаа өнгөрсөн хоёр долоо хоногийн хугацаанд өрнөж, өчигдөр орон даяар санал хураасан бөгөөд 200 мянган гишүүний 49 хувь буюу 74 908 нь оролцож дээрх дүн гарчээ. Сунгаанд УИХ-ын гишүүн О.Цогтгэрэл, Нийслэлийн Ардчилсан намын дарга Д.Пүрэвдаваа, МҮХАҮТ-ын ерөнхийлөгч О.Амартүвшин, Ардчилсан Залуучуудын холбооны тэргүүн С.Эрдэнэболд нар өрсөлдсөн.
Энэ үеэр АН-ын даргын сунгаанд ялалт байгуулсан, УИХ-ын гишүүн О.Цогтгэрэл хэлэхдээ, "АН-ын энэ удаагийн даргын сонгууль амаргүй нөхцөлд болж өндөрлөлөө. Тухайлбал, гадна талдаа цар тахлын нөхцөл байдал хүндэрч зарим аймагт хөл хорио тогтоосон. Мөн санал тоолох ажилд цагийн хязгаарлалт хийх хүндрэл гарсан. Түүнчлэн намын хоёр тамганы маргаан асуудал үүсгэлээ. Намынхаа гишүүдтэй цахимаар уулзахад, Ардчилсан намын орон зай хаана байгааг асууж, шаардсан. Нөгөө талаар, Ардчилсан намыг үзэл санаан дээрээ бат зогсохыг нийгэм, эдийн засаг, улс төрийн олон нөхцөл шаардаж байна. Тиймээс үзэл санаан дээрээ бат зогсдог, гишүүдийнхээ оролцоог хангадаг, ардчиллын үүргээ хангахуйц нам болох шаардлагатай байна" хэмээгээд сунгаанд хамт өрсөлдсөн хүмүүст улс төрийн цаашдын ажилд нь амжилт хүслээ.
