Улаанбаатар
ШУТИС-д уул уурхайн геотехникийн лаборатори байгуулна
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. ШУТИС-ийн уул уурхайн геотехникийн инженерээр төгсөгчид Оюутолгой ХХК болон Рио Тинто компанийн үйл ажиллагаа явуулдаг 35 улсын гүний уурхайд ажиллах боломж бүрдлээ.
Өнөөдрийн байдлаар, 25 оюутан тус мэргэжлээр суралцаж байна.
ШУТИС-д уул уурхайн геотехник мэргэжлээр инженер бэлтгэх, олон улсын судалгааны төв байгуулах хамтын ажиллагааны гэрээнд гарын үсэг зурах ёслол өнөөдөр болов. Ийнхүү гэрээ байгуулснаар геотехникийн инженерийн тоог нэмж, чадамжийг дээшлүүлэх, төгсөгчдийг ажлын байраар хангах, дэлхийн түвшний уул уурхайн компанид ажиллах нөхцөл бүрдэхээс гадна уг мэргэжлээр Азийн бусад орноос оюутан элсүүлэн суралцуулах боломжтой болж байна.
Рио Тинто Монгол, “Оюутолгой” ХХК ШУТИС-ийн Геологи, уул уурхайн сургуультай хамтарч “Уул уурхайн геотехникийн мэргэжилтний чадамжийг дээшлүүлэх төсөл”-ийг 2019-2025 онд хэрэгжүүлэхээр харилцан ойлголцлын санамж бичгийг байгуулсан. Харин өнөөдөр уг төсөл их сургууль аж үйлдвэрийн хамтарсан томоохон хэмжээний төсөл болж буйгаараа онцлогтой.
Боловсролын салбарт хийж буй энэхүү хөрөнгө оруулалтыг эрдэс баялгийн салбарын төсөл гэж харахаас илүүтэй Монголын ирээдүйн хөгжилд оруулж буй хувь нэмэр гэж ойлгож байна. Уул уурхайн геотехникийн инженер залуус ирээдүйд чухал үүрэгтэй. Тэднийг бэлтгэж, ур чадварыг дээшлүүлэх, гадны экспертүүдийн туршлага, мэдээллээс суралцах боломж олдохын зэрэгцээ уул уурхайн геотехникийн лаборатори байгуулах гэж буйд талархаж байгаагаа Боловсрол, шинжлэх ухааны сайд илэрхийллээ.
“Рио Тинто Монгол”, “Оюутолгой” ХХК төсөлд нийт 2.75 сая ам.долларын хөрөнгө оруулалт хийж байна. Боловсролын салбарт хийж буй хөрөнгө оруулалтын эхлэл гэдгийг “Рио Тинто”-ийн Зэсийн группийн гүйцэтгэх захирал Б.Болд онцолсон юм.
ШУТИС-д уул уурхайн геотехник мэргэжлээр инженер бэлтгэх, олон улсын судалгааны төв байгуулах хамтын ажиллагааны гэрээнд “Оюутолгой” ХХК-ийн гүйцэтгэх захирал Армандо Торрес, ШУТИС-ийн ректор Б.Очирбат, “Рио Тинто Монгол” компанийн гүйцэтгэх захирал Х.Амаржаргал нар гарын үсэг зурж, Боловсрол, шинжлэх ухааны сайд Л.Энх-Амгалан, “Рио Тинто” группийн Зэсийн группийн гүйцэтгэх захирал Б.Болд нар гэрчээр оролцлоо.
