Улаанбаатар /МОНЦАМЭ/. “Шүүхийн тухай” хууль (шинэчилсэн найруулга)-иар Шүүхийн ерөнхий зөвлөл  (ШЕЗ), Шүүхийн сахилгын хороо (ШСХ)-г Үндсэн хууль (Үндсэн хуулийн нэмэлтээр)-ийн байгууллага болгосон билээ.

Үндсэн хуулийн эдгээр байгууллагууд “ Шүүхийн тухай” хуулиар өөрөө өөрийгөө зохион байгуулна. Зохион байгуулалт хийх хүртэл УИХ-ын хууль зүйн Байнгын хороо (ХЗБХ) -ны ажлын хэсэг гишүүдийг нь сонгон шалгаруулна. Сонгон шалгаруулалтыг  хууль мөрдөгдөж эхэлсэн (2021-3-1) хойш 120 хоногт багтаана. Хуулиар ажлын хэсгийг УИХ-ын гишүүн ахлах учиртай (УИХ-ын даргын захирамжаар томилсон УИХ-ын гишүүн ахална 77.2). Ажлын хэсэг (УИХ дахь олонх, цөөнх, Ерөнхийлөгч, Засгийн газар ХЭҮК, Хуульчдын холбоо, Өмгөөлөгчдийн холбоо, хууль зүйн сургалт судалгааны байгууллага, хууль зүйн их, дээд  сургуулийн санал болгосон төлөөллөөс бүрдсэн 11 гишүүнтэй байна).

Байнгын хорооны дарга С.Баямбацогт ажлын хэсгийг ахалжээ. Ажлын хэсэгт С.Далхаасүрэн (УИХ дахь МАН-ын бүлгийн Ажлын албаны дарга), Д.Батдорж (УИХ дахь АН-ын бүлгийн даргын зөвлөх), Б.Энхболд (ХЭҮК-ын гишүүн), Б.Баасандорж (ХЗДХЯ-ны Төрийн нарийн бичгийн дарга), Б.Саруул (ЕТГ-ын дэд дарга), М.Баасанбат (Монголын Өмгөөлөгчдийн холбооны дэд ерөнхийлөгч), А.Бямбажаргал (МУИС-ийн Хууль зүйн сургуулийн эрдэмтэн нарийн бичгийн дарга), Г.Амаржаргалан (“Шихихутуг” их сургуулийн Хувийн эрх зүйн тэнхимийн эрхлэгч) зэрэг хүмүүс Байнгын хорооны гишүүдийн олонхийн дэмжлэг авчээ. Хуульчдын холбооны төлөөлөл (Ерөнхийлөгч Б.Өнөмөнх) дэмжлэг аваагүй. Түүний орны гишүүнийг нөхөн нэр дэвшүүлэх боломж Хуульчдын холбоонд хэвээр хадгалагдах юм байна.

ШЕЗ, ШСХ-ны  шүүгч бус гишүүнд нэр дэвшигч нь Шүүхийн тухай хуулийн 76 дугаар зүйлийн 76.3-т заасан дараах шаардлагыг хангасан, Шүүхийн ерөнхий зөвлөлийн гишүүнээр ажиллаж байгаагүй Монгол Улсын иргэн байна:

1.хууль зүйн өндөр мэргэшилтэй;

2.эрх зүйч мэргэжлээр 10-аас доошгүй жил ажилласан;

3.төрийн алба хаах насны дээд хязгаарт хүрээгүй;

4.сүүлийн таван жил шүүгчээр ажиллаагүй;

5.сүүлийн таван жил улс төрийн албан тушаал болон улс төрийн намын удирдах албан тушаал эрхэлж байгаагүй;

6.эрүүгийн хариуцлага хүлээж байгаагүй гэх мэт шалгуурыг хангасан байх ёстой юм байна. Мөн бүрдүүлэх материалын жагсаалт гаргажээ.Тухайлбал:

1.нэр дэвших тухай хүсэлт, түүний хавсралт /“Шүүхийн ерөнхий зөвлөлийн болон Шүүхийн сахилгын хорооны шүүгч бус гишүүнийг сонгон шалгаруулах журам”-ын хоёрдугаар хавсралтаар баталсан загварын дагуу бичиж гарын үсэг зурсан байх/;

2.төрийн албан хаагчийн анкет /гарын үсэг зурсан байх/;

3.иргэний үнэмлэхийн хуулбар;

4.нийгмийн даатгалын дэвтрийн хуулбар, эсхүл түүнтэй адилтгах баримт бичиг;

5.эрх зүйн бакалаврын, эсхүл түүнээс дээш боловсролын зэргийн дипломын хуулбар;

6.хууль зүйн өндөр мэргэшилтэй гэдгийг нотлон харуулсан үйл ажиллагааны талаарх баримт;   

7.эрх зүйч мэргэжлээр 10-аас доошгүй жил ажилласныг нотлох баримт;

8.хүсэлт гаргагчийн талаарх тодорхойлолт;

9.Шүүхийн тухай хуулийн 76.3 эсхүл 95.3, 95.4, 95.8-д заасан шаардлагыг хангасныг нотлох  баримт бичиг бүрдүүлсэн  нэр бүхий хуульчдыг байнгын хороо бүртгэн авчээ.