Гэрээсээ ажиллах ажилтны хөдөлмөрийн гэрээг тодорхой болгоно

Монголын мэдээ | Улс төр
ariunbold@montsame.mn
2021-06-23 15:35:35

Улаанбаатар /МОНЦАМЭ/. УИХ-ын Нийгмийн бодлогын байнгын хорооны өнөөдрийн хуралдаанаар Хөдөлмөрийн тухай хуулийн шинэчилсэн найруулгын төслийн эцсийн хэлэлцүүлгийг хийв.


Хуулийн төслийг эцсийн хэлэлцүүлэгт бэлтгэсэн талаар УИХ-ын гишүүн, төслийг хэлэлцүүлэгт бэлтгэх үүрэг бүхий ажлын багийн ахлагч Ц.Мөнх-Оргил  танилцуулав. Тэрбээр, "Чуулганы нэгдсэн хуралдаанаар анхны хэлэлцүүлэг хийх үед хуралдаан даргалагчаас төслийн зарим зүйл, хэсэг, заалтыг гүйцээн боловсруулах чиглэл өгсөн. Энэ дагуу уртын ээлжээр ажиллах 14/14 хоногийн хугацааг багасгах тохиолдолд ажил үүрэг гүйцэтгэх, амрах хугацаа нь тэнцүү байхаар ажил олгогч, ажилтны төлөөлөгч харилцан тохиролцох, үл өрсөлдөх гэрээний үйлчлэх хугацаа хөдөлмөр эрхлэлтийн харилцаа дууссанаас хойш нэг жилээс илүүгүй байх, ажилтны хөдөлмөр эрхлэлтийн харилцааг энэ хуульд зааснаас бусад үндэслэлээр ажил олгогчийн саналаар цуцлахыг хориглох зэрэг зарчмын зөрүүтэй санал бэлтгэсэн.  Түүнчлэн ажлын баг энэ сарын 21-нд хуралдаж, ажил хаялт, хөдөлмөрийн эрхийн маргаан, гэрээсээ ажиллах ажилтны хөдөлмөрийн гэрээг тодорхой болгож, ажил олгогч ажилтныг мэргэжлээ дээшлүүлэх, давтан сурах боломжоор хангах, дагалдангаар суралцах ажилтны ажил олгогчоос болон ажилтнаас төлөх нийгмийн даатгалын шимтгэлийг тодорхой болгох санал бэлтгэсэн" гэв.


Хуулийн төслийн талаар УИХ-ын гишүүн Б.Энхбаяр, Д.Сарангэрэл нар асуулт асуув. Тухайлбал УИХ-гишүүн Д.Сарангэрэл ажилласан жилийг харгалзахгүйгээр жилийн ээлжийн амралтын хоногийг 20 хоног болгосныг оновчгүй гэж үзэж байгаа хэмээв.


Жилийн ээлжийн амралтын үндсэн хугацааг 15 хоногоор тогтоогоод, ажилласан жилээс шалтгаалж нэмэлт хоног олгодог хуучин зохицуулалтаараа явах саналыг Ц.Сандаг-Очир гишүүн хуулийн төслийг эцсийн хэлэлцүүлэгт бэлтгэх үеэр гаргасан учир энэ саналаар өнөөдөр санал хураалт явуулж шийдвэрлэнэ гэдгийг Ажлын багийн ахлагч Ц.Мөнх-Оргил хэллээ. 


Ингээд ажлын багаас бэлтгэсэн зарчмын зөрүүтэй 19 саналаар санал хураав. Түүнчлэн Хөдөлмөрийн тухай хуулийн шинэчилсэн найруулгын төслийн хамт өргөн мэдүүлсэн таван хуулийн төслийг анхны хэлэлцүүлгээр батлах УИХ-ын гишүүн Ц.Мөнх-Оргилын саналыг дэмжлээ. Тус хуультай хамт Аж ахуйн нэгжийн орлогын албан татварын тухай хуульд өөрчлөлт оруулах тухай, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд өөрчлөлт оруулах тухай, Мэдээллийн ил тод байдал ба мэдээлэл авах эрхийн тухай хуульд өөрчлөлт оруулах тухай, Татварын ерөнхий хуульд өөрчлөлт оруулах тухай, Эх, олон хүүхэдтэй өрх толгойлсон эх, эцэгт тэтгэмж олгох тухай хуульд өөрчлөлт оруулах тухай хуулийн төслийг өргөн мэдүүлсэн юм.


Түүнчлэн, УИХ-ын гишүүн, Ажлын багийн ахлагч Ц.Мөнх-Оргил Оюутолгой ХХК-иас Хөдөлмөрийн тухай хуулийн шинэчилсэн найруулгыг 2023 оны нэгдүгээр сарын 1-нээс хэрэгжүүлэх зэрэг долоон санал ирүүлснийг хүлээн авах үндэслэлгүй хэмээн үзсэнээ тайлбарлаж, протоколд тэмдэглүүлэв.

Холбоотой мэдээ