Монгол-Францын харилцааг өргөжүүлж, шинэ түвшинд хүргэх эрмэлзэлтэй байгаагаа илэрхийлэв

МОНГОЛЫН МЭДЭЭ | УЛС ТӨР
munkhbaatar@montsame.gov.mn
2021-09-14 15:49:41
@s_munkhbaatar

Улаанбаатар /МОНЦАМЭ/. УИХ-ын гишүүн, УИХ дахь Монгол-Францын парламентын бүлгийн дарга Ж.Чинбүрэнгийн урилгаар Бүгд Найрамдах Франц Улсын Сенат дахь Франц-Монголын найрамдлын бүлгийн дарга Филипп Мүэй тэргүүтэй төлөөлөгчид манай улсад албан ёсны айлчлал хийж байна.


Айлчлалын хүрээнд төлөөлөгчид УИХ-ын дарга Г.Занданшатарт бараалхаж, УИХ дахь Монгол-Францын парламентын бүлгийн дарга Ж.Чинбүрэн болон УИХ дахь эмэгтэй гишүүдийн бүлгийн төлөөлөлтэй уулзаж, хоёр улсын харилцаа хамтын ажиллагааг өргөжүүлэх асуудлаар санал солилцсон юм. Дээрх уулзалтуудын дараа УИХ-ын гишүүн, УИХ дахь Монгол-Францын парламентын бүлгийн дарга Ж.Чинбүрэн, Бүгд Найрамдах Франц Улсын Сенат дахь Франц-Монголын найрамдлын бүлгийн дарга Филипп Мүэй нар хэвлэлийнхэнд мэдээлэл өглөө.


Монгол, Францын харилцаа “Найрсаг харилцаа, хамтын ажиллагаа”-ны түвшинд 55 жилийн хугацаанд амжилттай хөгжиж ирсэн. Уг харилцааг ахиулж, “Иж бүрэн түншлэл”-ийн түвшинд хүргэх эрмэлзэлтэй байгаагаа УИХ дахь Монгол-Францын парламентын бүлгийн дарга Ж.Чинбүрэн илэрхийлж, үүнд хоёр талын тэргүүлж буй парламентын бүлгийн гүйцэтгэх үүрэг маш чухал болохыг онцлон тэмдэглэлээ.



Бүгд Найрамдах Франц Улсын Сенат дахь Франц-Монголын парламентын бүлгийн дарга Филипп Мүэй хэлэхдээ, “Манай хоёр улсын харилцаа олон зуун жилийн түүхэн уламжлалтай. Хоёр улсын харилцааг илүү өндөр түвшинд хүргэх, тэр дундаа парламент хоорондын хамтын ажиллагааг өргөжүүлэх хүсэл эрмэлзэл аль аль талд байгаад баяртай байна. Франц Улсыг Монгол Улс, Монголын ард түмэн “гуравдагч хөршөө” хэмээн үздэгт талархалтай байдаг бөгөөд энэ нь харилцааны түвшинг ахиулахад том түлхэц болно гэдэгт итгэлтэй байна. Айлчлалын хүрээнд хийсэн уулзалтуудаар бид  улс төр, эдийн засаг, батлан хамгаалах, соёл, хүмүүнлэг, эрүүл мэнд, боловсролын салбарын харилцаа, хамтын ажиллагааг эрчимтэй хөгжүүлэх асуудлаар ярилцаж, санал солилцлоо” хэмээгээд айлчлалыг амжилттай зохион байгуулсанд талархал илэрхийлэв гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.

Холбоотой мэдээ