Шинэ-Идэр сумын Баянзүрх багт Дахин дамжуулах станц ашиглалтад орлоо

ОРОН НУТГИЙН МЭДЭЭ | ХӨВСГӨЛ
gantuyaB@montsame.mn
2021-09-28 18:14:05

Хөвсгөл /МОНЦАМЭ/. Хөвсгөл аймгийн Шинэ-Идэр сумын Баянзүрх багт Харилцаа холбоо, мэдээллийн технологийн газрын Бүх нийтийн үйлчилгээний үүргийн сангийн 210 сая төгрөгийн хөрөнгө оруулалтаар үүрэн холбооны Дахин дамжуулах станц барьж ашиглалтад орууллаа.

Үүрэн холбооны сүлжээ нэвтэрснээр 3G технологиор интернетэд холбогдон малчны хүүхдүүд цахимаар хичээлээ хийх, малчид цаг агаарын мэдээ, мал мах, түүхий эдийн ханш гээд хэрэгтэй мэдээллээ цаг алдалгүй авах боломж бүрдэж байна.

Мөн өнгөрсөн онд Шинэ-Идэр сумын Сангийн далай багийн Жаргалантын хярд Бүх нийтийн үйлчилгээний үүргийн сангийн 180 сая төгрөгийн хөрөнгө оруулалтаар Үүрэн холбооны дахин дамжуулах станц барьж мөн ашиглалтад оруулсан юм.  


"Тус аймагт өнгөрсөн хугацаанд Харилцаа холбооны салбарт 3,2 тэрбум төгрөгийн хөрөнгө оруулалтаар Цахим үйлчилгээний төвийн байр, өндөр хурдны шилэн кабель, үүрэн холбооны 3G сүлжээ болон дахин дамжуулан станцуудыг барьж ашиглалтад оруулаад байна" гэдгийг нээлтийн үеэр УИХ-ын гишүүн Л.Мөнхбаатар хэлж байлаа.


Холбоотой мэдээ