“Merck” компани “COVID-19”-ийн эмээ Японд хэрэглэх хүсэлт гаргажээ

ДЭЛХИЙН МЭДЭЭ | ЭРҮҮЛ МЭНД
khulan@montsame.gov.mn
2021-12-05 13:14:57

ТОКИО. /Kyodo/. АНУ-ын “Merck & Co” эмийн компанийн Япон дахь салбар компани “COVID-19”-ийн дотуур ууж хэрэглэдэг эмийг үйлдвэрлэх, худалдаалах хүсэлтийг тус улсын Эрүүл мэнд, хөдөлмөр, нийгмийн хамгааллын яаманд гаргажээ. 


Тодруулбал, “MSD K.K” компани вирусийг биед нэвтрэх, өсөж үржихээс сэргийлдэг “молнупиравир” эмэнд зөвшөөрөл хүсжээ. Эрүүл мэндийн яам зөвшөөрөл олгосон тохиолдол энэ эм нь Японд хэрэглэх “COVID-19”-ийн анхны дотуур ууж хэрэглэдэг эм болно. 


Японы Засгийн газар “Merck” компанитай 1.6 сая тун эм худалдан авах гэрээг хэдийнээ байгуулсан бөгөөд оны эцсээр хүлээн авах төлөвтэй байгаа юм. Гэртээ ууж хэрэглэх боломжтой энэ эмийг Япон улс цар тахалтай тэмцэхэд чухал үүрэг гүйцэтгэнэ хэмээн үзэж байгаа ажээ. 


Эрүүл мэндийн яамны зөвлөх ажлын хэсэг “MSD K.K”-ийн хүсэлтийн талаар 12 дугаар сарын дундуур хэлэлцэж, ямар шинж тэмдэг илэрсэн өвчтөнүүдэд уулгахаа шийдвэрлэнэ гэдгийг уг мэдээлэлд ойр эх сурвалж мэдээлжээ. 


Эмнэлзүйн туршилтын үр дүнгээс үзэхэд, өвчтөнүүдэд эмийг халдварын шинж тэмдэг илэрснээс таван хоногийн дотор уулган плацебо уулгасан хүмүүстэй харьцуулахад эмнэлэгт хэвтэн эмчлүүлэх, улмаар нас барах эрсдэл нь 30 хувиар буурчээ. 


Япон, Европ, АНУ-д явуулсан эмнэлзүйн туршилтын эхний дүнгээр уг эм нь эмнэлэгт хэвтэх, нас барах эрсдэлийг 50 хувиар бууруулсан гэж урьд нь мэдээлж байсан ч туршилтад оролцогчдын тоог нэмэгдүүлсний дараа буурсан дүн үзүүлсэн байна. 


“MSD K.K.” компанийн мэдээлснээр, “молнупиравир” коронавирусний шинэ “омикрон” хувилбарын эсрэг үйлчлэх төлөвтэй байна. Уг хувилбар нь олон тооны мутацитай тул халдварлах чадвар өндөр, дахин халдвар авах эрсдэлийг нэмэгдүүлж болзошгүй байгаа юм. 


“Молнупиравир” эмэнд зөвшөөрөл олгох үйл явц явагдаж байгаа АНУ-д дотуур ууж хэрэглэдэг уг эмийг хүндээр өвчлөх эрсдэлтэй насанд хүрсэн хүмүүст хэрэглэх зөвшөөрлийг яаралтай журмаар олгох төлөвтэй байна. Энэ долоо хоногийн мягмар гарагт Хүнс, эмийн чанарын хяналтын газрын зөвлөхүүд уг эмэнд зөвшөөрөл олгохыг зөвлөсөн юм. 


Их Британи 11 дүгээр сарын 4-нд “молнупиравир”-ыг “COVID-19”-өөр хөнгөн, дунд хэлбэрээр өвчилсөн, хүндээр өвчлөх дор хаяж нэг эрсдэлт хүчин зүйл бүхий хүмүүст хэрэглэхийг зөвшөөрснөөр ийм шийдвэр гаргасан дэлхийн анхны орон болсон юм. Британийн эрх баригчид эмийг жирэмсэн эмэгтэйчүүдэд хэрэглэхийг зөвлөхгүй байгаа бөгөөд хүүхдүүдэд хэрэглэхийг зөвшөөрөөгүй байна. 


Ташрамд дурдахад, Японы эмийн “Shionogi & Co”, АНУ-ын “Pfizer” тэргүүтэй компаниуд мөн “COVID-19”-ийн дотуур ууж хэрэглэдэг эмийг гарган авахаар ажиллаж байгаа юм.

Холбоотой мэдээ