Улаанбаатар
УИХ-ын даргад БНСловак Улсын Ерөнхий сайд Роберт Фицо бараалхлаа
МОНГОЛЫН МЭДЭЭ | УЛС ТӨРМонгол Улсын Их Хурлын дарга М.Энхболдод өнөөдөр /2016.07.15/ Бүгд Найрамдах Словак Улсын Ерөнхий сайд Роберт Фицо тэргүүтэй төлөөлөгчид бараалхав.
Уулзалтын эхэнд УИХ-ын дарга М.Энхболд Бүгд Найрамдах Словак Улсын Ерөнхий сайд Роберт Фицотой уулзсандаа баяртай байгаагаа илэрхийлээд АСЕМ-ын дээд түвшний уулзалтад оролцохоор хүрэлцэн ирсэнд талархаж буйгаа уламжилсан юм.
Тэрээр, Монгол Улс, Словак Улс нь уламжлалт, найрсаг харилцаатай, нэгэн үед ардчилал, зах зээл, чөлөөт нийгмийг сонгон хамтдаа шилжилтийн үеийг амжилттай даван туулж, ардчиллын үнэт зүйлсийг хадгалж, хөгжүүлж чадсаныг цохон тэмдэглээд, хоёр улсын хооронд дипломат харилцаа тогтоосноос хойш дээд, өндөр түвшний айлчлал хэрэгжээгүй. Иймээс тодорхой шалтгааны улмаас хэрэгжээгүй Үндэсний зөвлөлийн дарга болон Ерөнхий сайдын айлчлалыг хэрэгжүүлэхэд бэлэн байгаа талаар дуулгав. Түүнчлэн Бүгд Найрамдах Словак Улс Европын Холбооны Зөвлөлийг 2016 оны 7 дугаар сараас эхлэн даргалах болсонд баяр хүргэж, Монгол Улсыг Европын Холбоотой хамтран ажиллахад дэмжлэг үзүүлж ажиллахыг хүслээ.
Мөн тэрээр хоёр талын уламжлалт харилцааны хүрээнд Эдийн засаг, худалдааны салбарын хамтын ажиллагааг бэхжүүлэхэд чухал нөлөө үзүүлэх “Хөрөнгө оруулалтыг хөхиүлэн дэмжих, харилцан хамгаалах тухай” хэлэлцээр, “Эдийн засгийн хамтын ажиллагааг хөгжүүлэх тухай” хэлэлцээр болон “Харилцан давхар татвар ногдуулахгүй байх тухай” хэлэлцээрийг байгуулах чиглэлээр ажиллаж байна. Монгол Улс Словак Улстай харилцаа, хамтын ажиллагаагаа хөгжүүлэх эрмэлзэлтэй байгаагийн зэрэгцээ, хоёр талын хамтын ажиллагааг ГХЯ-д хоорондын зөвлөлдөх уулзалт зэрэг байнгын механизмуудын хүрээнд хөгжүүлэх боломжтойг мэдэгдлээ.
Бүгд Найрамдах Словак Улсын Ерөнхий сайд Роберт Фицо УИХ-ын даргатай уулзаж байгаадаа баяртай байгаагаа илэрхийлээд, Парламентын ээлжит сонгуульд үнэмлэхүй ялалт байгуулсанд баяр хүргэв.
Ерөнхий сайд Роберт Фицо хоёр талын харилцаа, хамтын ажиллагааны хүрээнд эдийн засаг, худалдааны салбарын хамтын ажиллагааг бэхжүүлэхэд чухал нөлөө үзүүлэх эрх зүйн баримт бичгийг боловсруулан эцэслэх шаардлагатай байгаатай санал нэг буйгаа илэрхийлж, энэ тал дээр анхаарч ажиллана гэлээ.
Уулзалтын үеэр УИХ-ын дарга М.Энхболд Бүгд Найрамдах Словак Улсын Ерөнхий сайд Роберт Фицотой хоёр орны харилцаа, хамтын ажиллагааны асуудлаар болон Европ, Азийн бүс нутаг, олон улсын тавцанд хамтран ажиллах талаар санал солилцлоо гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.
