Улаанбаатар /МОНЦАМЭ/. Засгийн газрын өнөөдрийн ээлжит хуралдаанд томуу, томуу төст өвчнөөр өвчилсөн хүүхдийн тоо нэмэгдэж байгаатай холбогдуулан эмнэлгийн бэлэн байдал, тусламж үйлчилгээний нөхцөл байдлыг танилцуулсан тухай Эрүүл мэндийн сайд С.Энхболд мэдээлэв. 

Ерөнхий сайдын өгсөн чиглэлийн дагуу хүүхдийн өвчлөлийн байдал, тусламж үйлчилгээний хүртээмж, албаны нөөцийн байдлын талаар танилцуулга хийснийг тэмдэглээд, Засгийн газар Эрүүл мэндийн салбарт онцгой анхаарч буйг мэдээллийн эхэнд тодотгов. Ялангуяа, хүүхэд, эмэгтэйчүүдэд тусламж, үйлчилгээ үзүүлдэг эмнэлгийг олон улсын жишигт хүргэх чиглэлээр тодорхой хөрөнгө оруулалт хийж ажлын явцтай танилцаж байгаагаа дуулгав. Тухайлбал, энэ сарын 8 буюу Олон улсын эмэгтэйчүүдийн эрхийг хамгаалах өдрөөр ноднин зургаадугаар сарын 1-нд өгсөн үүрэг, даалгаврын хэрэгжилтийг биеэр шалгасан байна. Тус үүрэг даалгаврын хүрээнд, улсын хэмжээнд эх барихын тусламж үзүүлдэг төрөх эмнэлгийн орыг 100 хувь шинэчилжээ. 

Нийслэлийн "Хүрээ" амаржих газрын шинэ барилга, ЭХЭМҮТ-ийн засвар, өртгөтгөлийн ажлын санхүүжилтийг 2022 оны төсөвт суулгасан бөгөөд ажил нь эхэлж байгааг тэмдэглэлээ. 

Хэвлэл, мэдээллийн хэрэгслээр, хүүхдүүд эмнэлгийн коридорт хэвтэж байгаа гэсэн мэдээлэл гараад буйг дурдаад, нийслэлийн 9 дүүрэг, амбулаторийг илүү цагаар ажиллуулж, ор нэмэж дэлгэж байгааг Эрүүл мэндийн сайд С.Энхболд учирлав. Ингэхдээ, ахмадын тусламж, үйлчилгээний төвийн орыг чөлөөлж хүүхдийн тусламж руу шилжүүлэх үүрэг чиглэл өгсөн гэдгээ тодотгов. 

КОВИД-19 цар тахлын үед тусламж үзүүлэхээр байгуулсан амбулаториудыг томуу, томуу төст өвчлөлийн амбуларторийн хэлбэрт шилжүүлсэн байна. 

Томуу, томуу төст өвчний тандалтыг өмнө нь таван аймагт хийдэг байсан. Тэгвэл КОВИД-19 цар тахлын хугацаанд 21 аймагт молекул биологийн лаборатори байгуулснаар, 21 аймаг, нийслэлийн хэмжээнд томуугийн тандалт хийх боломж бүрдсэн байна. 

2017 оноос хойш томуу, томуу төст өвчин жилийн 25 долоо хоногт үргэлжилсэн бөгөөд оргил үедээ 5-7 хоног байдаг байна. 2019-2020 онд хамгийн их өвчлөлтэй жил байсныг Эрүүл мэндийн сайд мэдээллийн үеэр тодотгов. Харин 2020-2021 онд өвчлөл бага байсан нь коронавирусний тархалттай холбогдуулан хязгаарлалтын арга хэмжээ авсантай холбоотой гэлээ. 

Ноднин 11 дүгээр сараас томуугийн өвчлөл эхэлсэн бөгөөд коронавируст цар тахлын дөрөвдүгээр давалгаа үүссэнээр, томуугийн өвчлөл эрс нэмэгдэж эхэлсэн байна. 0-9 насны хүүхдүүдийн өвчлөл давамгайлдаг бөгөөд нийт өвчлөлийн 80 хувийг эзэлж байгааг тодотгов. 

Томуугийн дэгдэлтийн идэвхжлийн шатанд зургаан аймаг, алаг цоог дэгдэлттэй 12 аймаг, аймгийн хэмжээний дэгдэлттэй гурван аймаг байна. Өмнөх долоо хоногийнхтой харьцуулахад, таван аймаг алаг цоог, хоёр аймаг аймгийн дэгдэлттэй түвшинд шилжжээ. 

Жилд 120-130 мянган хүүхэд томуу, томуу төст өвчин тусдаг бөгөөд одоогоор дэгдэлт үргэлжилж байгаа тул энэ жилийн эцсийн тоог гаргаагүй байна.