Улаанбаатар
Турк Иракийн хойд нутагт цэргийн ажиллагаа эхлүүлжээ
ДЭЛХИЙН МЭДЭЭ | УЛС ТӨР
АНКАРА. /Anadolu/. Туркийн Батлан хамгаалах яам Курдийн Ажилчны намын босогчдын эсрэг шинээр цэргийн ажиллагаа эхлүүллээ. Уг ажиллагаа Иракийн хойд хэсэгт явагдаж байна гэж “Anadolu” агентлаг мэдээлэв.
Тусгай хүчин болон агаарын хүчнийхэн уг ажиллагаанд оролцож байна гэж тус агентлаг мэдээлжээ. Туркийн Батлан хамгаалахын сайд Хулуси Акарын мэдээлснээр, нисэх онгоцууд Курдийн Ажилчны намын нуувч, бункер, хонгил, агуй, агуулахуудад амжилттай цохилт өгсөн байна.
“Ажиллагаа төлөвлөгөөний дагуу амжилттай үргэлжилж байна. Эхний шатанд тавьсан зорилгодоо хүрсэн. Бид манай улсыг 40 жилийн турш мөшгисөн террорист гай гаймшгаас ариун шударга үндэстнээ аврахаар бүрэн шийдсэн. Бидний тэмцэл сүүлчийн террористыг устгах хүртэл үргэлжилнэ” гэж сайд цохон тэмдэглэжээ.
Туркт хориглосон Курдийн Ажилчны намтай зэвсэгт мөргөлдөөн тус улсад 1984 онд эхэлсэн бөгөөд 2015 онд дахин сэргэжээ. Курдийн Ажилчны намын баазууд Иракийн хойд нутагт байдаг бөгөөд түүний эсрэг Туркийн Зэвсэгт хүчин агаарын болон хуурай газрын ажиллагаа явуулдаг байна. Туркийн Ерөнхийлөгч Тайип Эрдоганы урьд нь мэдэгдсэнээр, 2015 оны долоодугаар сараас хойш Курдийн Ажилчны намын 6 мянган гишүүнийг тус улсын нутаг дэвсгэрт, 6.9 мянган гишүүнийг тус улсын нутаг дэвсгэрээс гадна устгасан бол Туркийн аюулаас хамгаалах хүчин 1.2 мянга гаруй хүний хохирол амссан байна.
